बीए पासको प्रमाणपत्र नभए श्रीलंकाका लागि प्रस्तावित राजदूत भट्टराईको संसदीय अनुमोदन नहुने

७ असोज, काठमाडौं । श्रीलंकाका लागि प्रस्तावित राजदूत रामकृष्ण भट्टराईको संसदीय अनुमोदन नहुने परिस्थिति बनेको छ । उनको बीए पास भएको प्रमाणपत्र नभएका करण संसदीय अनुमोदन हुने-नहुने निर्णय रोकिएको छ । सोमबार पनि कोरम नपुगेका कारण संसदीय सुनुवाइ समितिमा कुनै निर्णय भएन । 

समितिमा दुई तिहाइ सदस्य उपस्थित नभएपछि श्रीलंकाका लागि प्रस्तावित राजदूत भट्टराईबारे निर्णय नभएको हो । समितिको बैठक मंगलबार पनि बोलाइएको छ । समितिमा कुनै पनि प्रस्ताव स्वीकृत वा अस्वीकृत गर्न दुई तिहाई सदस्यको मत आवश्यक पर्छ ।

१५ सदस्यीय समितिको सोमबारको बैठकमा ८ जना मात्र सांसद उपस्थित भएका थिए । भट्टराईको राजदूत नियुक्त हुनका लागि आवश्यक स्नातक तह पासको प्रमाणपत्र नभएपछि समितिले यसअघि १६ जनाको नाम अनुमोदन गर्ने क्रममा उनको नामबारे थप निर्णय आवश्यक रहेको भन्दै सोमबारका लागि बैठक बोलाएको थियो ।

समितिका सदस्य एवं कांग्रेस प्रमुख सचेतक श्याम घिमिरेले शैक्षिक प्रमाणपत्र उपलब्ध नभएको अवस्थामा अनुमोदन हुन नसक्ने जानकारी दिए । अहिलेसम्म समितिमा उनको प्रमाण पत्र उपलब्ध नभएको उनले बताए ।