नुहाउने क्रममा जितिया ब्रतालुको पोखरीमा डुबेर मृत्यु

७ असोज, काठमाडौं । रौतहटको राजदेवीमा एकजना जितिया ब्रतालुको नुहाउने क्रममा पोखरीमा डुबेर मृत्यु भएको छ । राजदेवी ८ लक्ष्मिपुर गाउँ छेउ पोखरीमा सोमवार दिउँसो नुहाउने क्रममा ब्रतालु महिला स्थानिय प्रमोद साह कानुको ४५ वर्षिया श्रीमती गिरीजा देवी कानुको डुबेर मृत्यु भएको हो ।

ब्रतालु महिला नुहाउने क्रममा डुबेको खबर पाउना साथ सशस्त्र प्रहरी बोर्डर आउट पोष्ट बेलविछवा र प्रहरी चौकी वेलविछवाबाट गएको संयुक्त टोलीले महिलाको उद्धार गरी तत्कालै प्रादेशिक अस्पताल गौरमा उपचारको लागि पठाएको थियो । तर डाक्टरले महिलालाई मृत घोषणा गरेको सशस्त्र प्रहरी बल नेपाल ११ नम्बर हेक्वा रौतहटका प्रमुख एसपी विक्रम हुमागाईले जानकारी दिएका छन् । 

मृतक महिलाको शव पोस्टमार्टमका लागि प्रादेशिक अस्पताल गौरमा राखिएको तथा घटना बारे आवश्यक अनुसन्धान भइरहेको जिल्ला प्रहरी प्रवक्ता डीएसपी एलिजा गिरीले बताएकी छिन् । तराई मधेशमा मनाइने जितिया पर्वको पूर्व संध्या अर्थात एकदिन अघि नहाय खाय मनाउने चलन रहिआएको छ । नहाय अर्थात नुहाउन स्नानको लागि महिलाहरू समूह समूहमा गाउँ नजिकको नदी, पोखरी, जलासयमा जाने गर्दछन्।

राजदेवीमा आज भएको घटना नुहाउने क्रममा  खुट्टा चिप्लीएर पोखरीको गहिरो पानीमा लडेर डुबेको हुन सक्ने प्रहरीको अनुमान रहेको छ । जितिया पर्व मनाउँदा पितृले मुक्ती पाउने र छोराको आयु लामो हुने घटना दुर्घटना बाट जोगिने जनविश्वास रहिआएको छ। रौतहटमा कतिपय ठाउँमा आजै नहाय खाए मनाइएको छ भने कैयौं ठाउँमा भोली मनाइने बताइएको छ ।