पूर्वडीआईजी जोशीको सरकारी वकिलको कार्यालय बयान सुरु, सीआईबीको टोली पनि आउँदै

८ असोज, पोखरा । पूर्वडीआईजी छविलाल जोशीलाई बयानका लागि सरकारी वकिल कार्यालय लगिएको छ । उनलाई मंगलबार बिहान साढे १० बजे सरकारी वकिल कार्यालय पुर्याइएको हो । अहिले बयान सुरू भएको छ ।  

जिल्ला अदालत कास्कीले जोशीलाई पाँच दिन हिरासतमै राखेर अनुसन्धान गर्न सोमबार प्रहरीलाई अनुमति दिएको थियो । जोशी आइतबार काठमाडौंबाट पक्राउ परेका थिए । उनलाई बुद्ध एयरको जहाजबाट आइतबार राति नै पोखरा ल्याइएको थियो । 

संसदीय छानबिन विशेष समितिले सहकारी बचत ठगीमा गोर्खा मिडियाका तत्कालीन सञ्चालक जोशी सहितलाई कारबाही गर्न सिफारिस गरेको थियो । गृह मन्त्रालयले सिफारिस तत्काल कार्यान्वयन गर्न भनेकै दिन जोशी पक्राउ परेका थिए ।  

यसैबीच पोखरा उपमहानगरपालिका वडा नम्बर–५ स्थित सूर्यदर्शन सहकारीको रकम अपचलनबारे अनुसन्धान गर्न केन्द्रीय अनुसन्धान ब्युरो (सीआईबी)ले  टोली आउने भएको छ । पूर्व डीआईजी छविलाल जोशीलाई पक्राउ गरेर जिल्ला प्रहरी कार्यालय कास्कीले सूर्यदर्शन सहकारीको रकम अपचलनबारे दोस्रो चरणको अनुसन्धान गरिरहेको छ ।