३० लाख लिएर बलात्कार मुद्दामा फसाउन खोजेको आरोपमा भैंसेपाटीकी इन्चार्ज शाहीमाथि कारवाही सुरु

१० असोज, काठमाडौं । एक व्यवसायीबाट ३० लाख रकम लिएर उसैलाई बलात्कार सम्बन्धी मुद्दामा फसाइदिने धम्की दिएको आरोपमा प्रहरी प्रभाग भैंसेपाटीकी प्रमुख इन्स्पेक्टर बिनुकुमारी शाहीमाथि कारवाही सुरु गरिएको छ । उनको जिम्मेवारी खोसिएको उपत्यका प्रहरी कार्यालय रानीपोखरीले जनाएको छ । 

उनीमाथि थप छानबिन गर्न तत्कालका लागि जिम्मेवारीबाट मुक्त गरिएको हो । शाहीमाथि एक जना व्यक्तिलाई नियन्त्रणमा लिएर ३० लाख रुपैयाँ लेनदेन गरेको आरोपपछि काठमाडौं उपत्यका प्रहरी कार्यालय रानीपोखरीले छानबिन गर्न समिति गठन गरेर कारवाही सुरु गरेको हो । जिल्ला प्रहरी परिसर ललितपुरका डीएसपी नरहरि अधिकारीको नेतृत्वमा छानबिन गर्न पाँच सदस्यीय समिति गठन गरिएको जानकारी दिइएको छ । 

समितिलाई यथाशक्य प्रतिवेदन बुझाउन भनिएको छ ।  यस घटनामा अन्य दुई जनालाई पक्राउ गरी अनुसन्धान गरिरहेको बताइएको छ । शाहीमाथि आपराधिक लाभ लिन नहुने कसुरमा अनुसन्धान भइरहेको छ । यो अनियमिततामा प्रहरी निरीक्षकको संलग्नता भएका आधारहरू देखिएकाले तत्काल निलम्बनको लागि सिफारिस गरिएकाे छ । 

प्रहरीका अनुसार ललितपुरको प्रहरी प्रभाग भैँसेपाटी (बुङमती)मा मोरङ घर भएका एक व्यापारीलाई थुनामा राखी ३० लाख रुपैयाँ लेनदेन गरी छाडिएको थियो । ललितपुर प्रहरीले हनी ट्रयापिङमा संलग्न एक युवती र एक युवकलाई पक्राउ गरी अनुसन्धान अघि बढाइरहेको छ । यसमा भैँसेपाटी प्रभागकी प्रमुख रहेकी इन्स्पेक्टर बिनुकुमारी शाहीमाथि समेत छानबिन अघि बढाउनुपर्ने देखिएकाे छ ।  

अनुसन्धानमा खटिएका अधिकारीहरूका अनुसार भेट्न बोलाएकी युवतीले ६० लाख रुपैयाँ मागेको र पछि ३० लाख रुपैयाँमा मिलेको थियो । ती व्यापारी युवतीसँग घुम्न गएकाले आफू फस्न सक्ने डरले पैसा बुझाउन तयार भएको देखिएको छ । लेनदेनको बार्गेनिङ प्रहरी अधिकारीकै अगाडि भएको प्रारम्भिक छानबिनले देखाएको छ । प्रारम्भिक छानबिनमा प्रभागकी इन्स्पेक्टर शाहीको भूमिका शंकास्पद देखिएको छ ।