प्रधानन्यायाधीश श्रेष्ठलाई संविधान विपरीत न्यायाधीश नियुक्तिका लागि सिफारिस नगर्न बारको चेतावनी

११ असोज, काठमाडौं । नेपाल बार एशोसिएसनले संविधानमा भएको व्यवस्था विपरीत न्यायाधीश नियुक्तिको सिफारिस नगर्न प्रधानन्यायाधीश विश्वम्भरप्रसाद श्रेष्ठलाई चेतावनी दिएको छ । यसको विरोधमा नेपाल बारले शुक्रबार न्यायपरिषद अगाडि धर्ना दिएको छ । 

सेवा निवृत्त हुनै लागेका प्रधानन्यायाधीश श्रेष्ठले संविधानका व्यवस्था विपरीतको न्याय परिषद् नियमावलीमा टेकेर नयाँ न्यायाधीश नियुक्त गर्न लागेको बारको आरोप छ । नेपाल बारमा आबद्ध कानुन व्यवसायीहरूले न्याय परिषदको सचिवालय बाहिर प्रदर्शन गरेका छन् । न्याय परिषद् नियमावलीका सम्बन्धमा देखिएका समस्या समाधान गर्न कार्यदल गठन गरिए पनि बार बेन्चबीच विवाद मिलेको छैन । 

कार्यदलमा कुनै विषय नराखिकन न्याय परिषदको बैठकबाट न्यायाधीश नियुक्तिका लागि सिफारिस गर्ने असंवैधानिक कदम अघि बढाउने प्रयास गरेपछि बाध्य भएर निरन्तर रुपमा धर्नालगायतका विरोध प्रदर्शनका कार्यक्रम अघि बढाउने निर्णय लिनु परेको बारको भनाइ छ । प्रधानन्यायाधीश श्रेष्ठको अवकाश हुने समय नजिकिएको छ ।