दशैँ अगाडी उखु र दूग्ध किसानको बक्यौता रकम भुक्तानी गर्न २ अर्ब निकासा

११ असोज, काठमाडौँ । सरकारले दुग्ध तथा उखु किसानको बक्यौता तिर्न करिब २ अर्ब रुपैयाँ निकासा गरेको छ । रकम निकासा भएपछि दूग्ध र उखु किसानले दसैंअगाडि नै बक्यौता रकम पाउने भएका छन् । दूग्धतथा उखु किसानका लागि झन्डै दुई अर्ब रुपैयाँ निकास भएको कृषि तथा पशुपक्षी विकास मन्त्रालयले जनाएको छ ।

दूग्धकिसानहरूको बक्यौता रकम तिर्नका लागि शुक्रबार मात्र सार्वजनिक ऋण व्यवस्थापन कार्यालयले ऋण लगानीको तमसुक तथा भुक्तानीका लागि अनुमति दिएको छ । आठ जिल्लाका उखु किसानले पाउनु पर्ने १ अर्ब ४५ करोड बढी  रकम कृषि मन्त्रालयले रकमान्तर गरी भुक्तानीका लागि जिल्लाहरूमा पठाएको छ । कृषि तथा पशुपंक्षी विकासमन्त्री रामनाथ अधिकारीले उखु तथा दूग्ध किसानहरूको बाँकी रकम दसैँअघिनै भुक्तानी गरिने जानकारी दिएका छन् ।

उनले दूध र उखु किसानको दसैँ घर घरमा आउने भन्दै यसको चाँजो मिलाउने सबैलाई धन्यवाद पनि दिएका छन् । महालेखा नियन्त्रक कार्यालयको अनुमति र अर्थ मन्त्रालयले रकम बाँडफाँड गरी शुक्रबारनै  सम्बन्धि जिल्लाका कोष तथा लेखा नियन्त्रक कार्यालयलाई पठाएको उनले बताए । कञ्चनपुर, नवलपरासी पश्चिम, बारा, रौतहट, सर्लाही, महोत्तरी, सिराहा र सुनसरी जिल्लाका उखु किसानले पाउनुपर्ने रकमका लागि एक अर्ब ४५ करोड ३२ लाख २१ हजार ८ सय ६८ रुपैयाँ सम्बन्धित जिल्लालाई पठाएको उनको भनाइ छ ।