सेनाको हेलिकोप्टरबाट रोशीको मंगलटार क्षेत्रबाट ८१ जनाको उद्दार, एकहजार बढी अलपत्र

१३ असोज, काभ्रे । काभ्रे जिल्लाको रोशी गाउँपालिकाको मंगलटार क्षेत्रबाट नेपाली सेनाको हेलिकोप्टरले ८१ जनाको उद्दार गरेको छ । सेनाले बीपी राजमार्गमा फसेकाहरूको उद्दार कार्य जारी राखेको छ । सो क्षेत्रमा एकहजारभन्दा बढी मानिस फसेको अनुमान गरिएको छ । 

जिल्ला प्रहरी कार्यालय काभ्रेका अनुसार अहिलेसम्म रोशी गाउँपालिकाको मंगलटार क्षेत्रबाट ८१ जनाको उद्धार गरेर धुलिखेल ल्याइएको छ ।  नेपालथोक–धुलिखेल खण्डमा १ हजारभन्दा बढी नागरिक बसेको र उद्धार गर्नुपर्ने देखिएको छ । जिल्ला प्रहरी कार्यालय काभ्रेका प्रहरी नायब उपरीक्षक दिनेशबहादुर कुँवरले सुरुमा नेपाली सेनाको हेलिकप्टर मार्फत मंगलटारमा खाद्यान्न पुर्याएको बताए । 

अहिले राजमार्गमा फसेकाहरूको उद्दार जारी छ । उद्धार गरिएकामध्ये १३ जना बिरामी समेत छन् । जिल्लामा ठूला मानवयि र भौतिक संरचना क्षति भए पनि यकिन विवरण संकलन सुरु गरिएको छ । विभिन्न स्थानीय तहसँग समन्वय गर्ने प्रयास भए पनि विद्युत् र दूरसञ्चार सेवा समेत अवरोध हुँदा समस्या भएको छ । बीपी र अरनिको सहित अधिकांश स्थानीय तह जोड्न सडक अवरुद्ध छ ।