दिल्लीमा पक्राउ गरी नेपाल ल्याइएका ढोरपाटनका मेयर नेपालीलाई पठाइयो बागलुङ

१३ असोज, काठमाडौं । सहकारी बचतकर्ताको सवा अर्ब अपचलन गरी फरार भएका बागलुङको ढोरपाटन नगरपालिकाका मेयर देवकुमार नेपालीलाई बागलुङ पठाइएको छ । उनलाई इन्टरपोलको सहयोगमा भारतको नयाँ दिल्लीमा पक्राउ गरिएको थियो । शुक्रबार पक्राउ परेका उनलाई काठमाडौं ल्याएर बाग्लुङ पठाइएको हो ।  

सहकारीको रकम ठगेको भन्दै उजुरी परेपछि नेपाली करिब डेढ वर्षदेखि फरार रहेका थिए । उनलाई विमानबाट काठमाडौँ ल्याएर थप अनुसन्धानको लागि बागलुङ पठाइएको सीआईबीले जनाएको छ । पोखरा र बागलुङमा सञ्चालित ईमेज बचत तथा ऋण सहकारी संस्थाको संस्थापक अध्यक्ष तथा पोखरामा सञ्चालित सुर्यदर्शन बचत तथा ऋण सहकारी संस्थाको संचालक समिति उपाध्यक्ष रही सहकारीको एक अर्ब ३८ करोड ६३ लाख १३ हजार ५२५ रुपैयाँ अपचलन गरेको आरोप छ ।

सीआईबीका अनुसार सोही प्रकरणमा बागलुङको बुर्तिबाङका ओम प्रसाद दर्जीलाई समेत पक्राउ गरी बागलुङ पठाइएको छ । ०७९ को निर्वाचनमा ढोरपाटनको मेयर बनेका नेपालीले सहकारीको अध्यक्षका रुपमा बचत रकम अपचलन गरेको खुलेपछि उनीविरुद्ध बचतकर्ताले उजुरी दिएका थिए । प्रहरीले मेयर नेपालीसमेत ८ जनालाई प्रतिवादी बनाएर सहकारी ऐन २०७४, अन्तर्गतको कसुरमा बाग्लुङ जिल्ला अदालतमा मुद्दा विचाराधीन छ । त्यसैले उनलाई बागलुङ पठाइएको हो ।