सिटिजन्स बैंकद्वारा दैवी प्रकोप उद्धार तथा राहत कोषमा २५ लाख सहयोग

१४ असोज, काठमाडौं । सिटिजन्स बैंक इन्टरनेसनल लिमिटेडले अविरल वर्षाले देश नै प्रभावित भई ठूलो जनधनको क्षति पुगेकाहरुको राहतको उद्देश्यले सामाजिक उत्तरदायित्व अन्तर्गत पीडितहरूको राहत र पुनर्स्थापनाको लागि सहयोग प्रदान गरेको छ ।

शहरी विकास मन्त्रालयमा २०८१ असोज १३ गते आयोजित एक कार्यक्रम बीच कार्यवाहक प्रधानमन्त्री एवम् उपप्रधान तथा शहरी विकास मन्त्री प्रकाशमान सिंहलाई बैंकका अध्यक्ष प्रबल जंग पाण्डेले रु २५ लाखको चेक हस्तान्तरण गरेका हुन् ।

समाहरोमा  सूचना तथा संचार मन्त्री पृथ्वी सुब्बा गुरुङ ,बैंकका प्रमुख कार्यकारी अधिकृत  गणेशराज पोखरेल र प्रमुख प्रशासकीय अधिकृत नारायण राज अधिकारी लगायतको उपस्थिति रहेको थियो । बैंकले प्रकोपबाट ज्यान गुमाएका परिवारप्रति हार्दिक समवेदना व्यक्त गर्दै घाईतेहरुको शीघ्र स्वास्थ्यलाभका लागि कामना समेत गरेको छ । यस घटनाबाट प्रभावित  सम्पूर्णजनहरुप्रति तत्काल सहयोग तथा राहत पुग्ने विश्वास पनि बैंकले व्यक्त गरेको छ ।

सिटिजन्स बैंकले यस अघि पनि २०७२ सालको विनाशकारी भूकम्पबाट पीडितहरुको उद्धार तथा उपचारको उद्देश्यले प्रधानमन्त्री दैबी प्रकोप उद्धार तथा राहत कोषमा आर्थिक सहयोग स्वरुप रु १ करोड  प्रदान गरेको  थियो  र कर्णाली प्रदेशको जाजरकोटमा मिति २०८०.०७.१७ गतेका दिन गएको विनाशकारी भूकम्पबाट पीडितहरुको उद्धार तथा उपचारको उद्देश्यले प्रधानमन्त्री दैवी प्रकोप उद्धार तथा राहत कोषमा रु २५ लाखको सहयोग प्रदान गरेको थियोे ।

बैंकले आगामी दिनमा पनि समाजको हितका लागि यस्ता सहयोगात्मक प्रयासहरू जारी राख्ने प्रतिबद्धता पनि जनाएको छ । सिटिजन्स बैंक इन्टरनेसनल लिमिटेडले देशैभरी फैलिएका आफ्ना १८८ वटा शाखा, १४८ वटा ए।टि।एम। र  ९७ वटा शाखा रहित बैंकिङ ईकाईहरुबाट १६ लाख ६४ हजार ग्राहकवर्गलाई आधुनिक बैंकिङ सेवाहरु प्रदान गर्दै आएको छ ।