खराब व्यवस्थापनले प्रधानमन्त्री फर्किंदा त्रिभुवन अन्तर्राष्ट्रिय विमानस्थल अस्तव्यस्त, उडान प्रभावित

१४ असोज, काठमाडौं । व्यवस्थापकीय कमजोरीका कारण प्रधानमन्त्री केपी शर्मा ओली सोमबार अमेरिका भ्रमण सकेर फर्किएको समयमा विमानस्थल अस्तव्यस्त देखिएको छ । आधा घण्टा नियमित उडान पूर्णरूपमा प्रभावित भए । व्यवस्थापन सही नहुँदा विमानस्थलको उडान व्यवस्थापन भद्रगोल हुनपुग्यो  । 

विमानस्थल प्रशासनले सोमबार दिउँसो ३ः५५ बाट आघा घण्टाका लागि ‘भीभीआईपी मुभमेन्ट’ भन्दै नोटिस जारी भएको थियो । नोटिस जारी भएको समयमा आन्तरिक विमानस्थलमा रहेका जहाज र अन्तर्राष्ट्रिय जहाजलाई उड्न दिइएको थिएन अवतरण गर्न आइरहेका जहाजलाई होल्ड गराइएको थियो । 

प्रधानमन्त्री चढेको जहाज अवतरण गरेपछि भने उडान सामान्य भएका थिए । बिहानैबाट त्रिभुवन विमानस्थलमा उडान व्यवस्थापनमा चाप भएको थियो । जसले गर्दा निर्धारित उडानहरू नै एक घण्टासम्म डिले भइरहेको अवस्थामा प्रधानमन्त्री आउँदा उडान थप प्रभावित भए । 

यसैबीच राष्ट्रसंघीय महासभाबाट १० दिनपछि स्वदेश फर्किएका प्रधानमन्त्री केपी शर्मा ओलीले नेपालमा विपद्ले गराएको क्षतिबारे दुखः व्यक्त गरेका छन् । त्रिभुवन विमानस्थलमा प्रधानमन्त्रीले रेड अलर्ट जारी गरे पनि पहिरो कहाँ कहाँ जान्छ भनेर पूर्वानुमान नभएको बताए । उनले भने, ‘काठमाडौंमा यति डुबान होला भन्ने कल्पना थिएन ।’

ओलीले सञ्चारकर्मीसँग बोले लगत्तै जारी प्रेस वक्तव्यमा विपद्का मृतकप्रति श्रद्धान्जली व्यक्त गरिएको छ । उनले घाइतेको स्वास्थ्यलाभ कामना गरेका छन् । ओलीले सरकारी निकाय र जनस्तरबाट उद्धार कार्य जारी रहेको भन्दै धैर्य गर्न आग्रह पनि गरेका छन् । उनले सरकारले सहायता र राहतमा कसर बाँकी नराख्ने प्रतिबद्धता पनि जनाए ।

विपद्का बेला प्रधानमन्त्रीले आवश्यकभन्दा लामो भ्रमण गरेको भन्दै आलोचना भइरहेका बेला ओली पूर्वनिर्धारित भ्रमण तालिका अनुसार नै स्वदेश फर्केका हुन् । वक्तव्यमा ओलीले १० दिने भ्रमण क्रममा गरेका भेटवार्ता र तिनको उपलब्धिबारे चर्चा गरिएको छ ।