एभरेष्ट महिला भलिबल लिग: चितवनको विजयी शुरुवात

१५ असोज, काठमाडौं । एभरेष्ट महिला भलिबल लिग अन्तर्गत गएराति सम्पन्न खेलमा चितवन शक्तिले गण्डकी थण्डर्सलाई पराजित गरेको छ । राति सम्पन्न खेलमा चितवनले गण्डकीलाई ३-१ को सेटले पराजित गरेको हो । चितवनले पहिलो सेट २५-२२ ले जितेको थियो भने गण्डकीले दोस्रो सेट २५-१९ ले जितेको थियो ।

त्यसपछि चितवनले शानदार कमब्याक गर्दै तेस्रो सेट २५-२३ र चौथो सेट २५-१८ ले जितेको थियो । यस खेलमा उत्कृष्ट प्रदर्शन गरेकी चितवनकी सलिना बुढा मगर खेलको प्लेयर अफ द म्याच बनेकी थिइन् । यस अघि सोमबार ललितपुर र कर्णालीले आ-आफ्नो खेल जितेका थिए । 

लिगमा आज पनि तीन खेल हुँदै छन् । जस अन्तर्गत पहिलो खेल गण्डकी र कर्णालीबीच अपरान्ह ३; ४५ बजेदेखि हुने छ भने दोस्रो खेल काठमाडौँ र चितवनबीच ५: ४५ बजेदेखि शुरु हुने छ । त्यस्तै तेस्रो खेल ललितपुर र मधेशबीच ७: ४५ बजेदेखि शुरु हुने छ ।