प्रहरीमा एक एआईजी, पाँच डीआईजी खाली, आरोपीलाई चुपचाप बिदाई

१५ असोज, काठमाडौं । नेपाल प्रहरीमा एक एआईजी र पाँच डीआईजी पद रिक्त भएको छ । डीआईजी यज्ञविनोद पोखरेलले अवकाश पाएसँगै एक एआईजी र पाँच डीआईजीको पद रिक्त भएको हो ।

विपत्तिमा नेपाल नभएका आईजीपी बसन्तबहादुर कुँवरको अनुपस्थितिमा निमित्त प्रहरी महानिरीक्षक एआईजी टेकप्रसाद राईले सोमबार उनको बिदाई गरेका थिए । मधेश प्रदेशबाट समयावधि नपुग्दै तानिएका र कारवाही गर्ने हल्ला गरिएका डीआईजी पोखरेललाई सोमबार चुपचाप बिदाई गरिएको थियो ।

बिदाइ समारोहलाई सम्बोधन गर्दै निमित्त प्रहरी महानिरीक्षक राईले सेवानिवृत्त भएका प्रहरी नायव महानिरीक्षक पोखरेलले संगठनबाट सुम्पिएको जिम्मेवारी इमानदारीताका साथ सम्पन्न गरेको उल्लेख गरेर बिदाई गरेका थिए । डीआईजी पोखरेल बैंक खातामा स्रोत नखुलेको पैसा भेटिएपछि गत महिना विवादमा परेको विषयलाई निमित्त आईजीपीले उठाउन चाहेनन । राईले पोखरेल इमानदार भएको भन्दै प्रशंसा गरेर बिदा गरे । यद्दपि डीआईजी पोखरेलले उक्त रकम छोरा विदेश पठाउन सापटी लिएको दावी गर्दै आएका छन् ।

बैंक खातामा स्रोत नखुलेको पैसा भेटिएपछि उनलाई मधेस प्रदेशको प्रहरी प्रमुखबाट हटाइएको थियो । त्यहाँ अहिले लालमणी आचार्यलाई पठाइएको छ । २०५२ साल कात्तिक २७ गते प्रहरी निरीक्षक पदमा भर्ना भएका पोखरेल उमेर हदका कारण अवकाश पाएका हुन् । उनको अवकाशसँगै नेपाल प्रहरीकाे एआईजी एक र डीआईजीको पाँच पद रिक्त भएपछि बढुवाको लाइनमा रहेका एक दर्जन बढी एसएसपीहरु दौडधुपमा लागेका छन् ।

असोज २१ सम्म कार्यसम्पादन मूल्याङकन बुझाउने समय भएकाले त्यसपछि बढुवा गर्ने गृह मन्त्रालयको तयारी छ । उनीहरुको बढुवामा अझै केही समय लाग्ने बताइएको छ । कार्यसम्पादन मूल्यांकन तथा प्रहरी दिवसपछि मात्रै रिक्त रहेको करिब दुई सय पदमा बढुवा हुने बताइएको छ ।