बानेश्वरको एभरेस्ट र सिंहदरबार अगाडिको होटल बसेरामा अखाद्य वस्तु भेटिए, विभागले तिरायो जरिवाना

१५ असोज, काठमाडौं । काठमाडौंका दुई ठूला होटलमा अखाद्य वस्तु राखेर बिक्री गरेको पाइएको छ । उनीहरुले पाहुनालाई खान अयोग्य वस्तु खुवाएको अनुगमनका क्रममा भेटिएको हो । नयाँ बानेश्वरमा रहेको होटल एभरेस्ट र सिंहदरबार अगाडि रहेको बुटिक होटल बसेरामा म्याद सकिएका वस्तु भेटिएका हुन् । उनीहरुलाई तीन–तीन लाख रुपैयाँ जरिवाना तिराइएको छ ।

वाणिज्य, आपूर्ति तथा उपभोक्ता संरक्षण विभागका अनुसार एभरेस्ट होटलको अनुगमनका क्रममा किचनमा म्याद गुज्रेका सामान फेला परेको र ति सामान पाहुनाका लागि प्रयोग भएको पाइएको थियो । सिंहदरबार अगाडिको बसेरा होटलले खानेपानीमा अधिक मूल्य लिएको र सरसफाइमा ध्यान नदिएको पाइएको हो । विभागको टोलीले अनुगमन गर्दा दुवै होटलले उपभोक्ता हितविपरीत व्यवसाय गरिरहेको भेटिएपछि नगद जरिवाना तिराइएको हो । 

विभागले चाडपर्व नजिकिएसँगै अनुगमन बढाएको छ । सोमबार मात्र कुल ३९ फर्ममा अनुगमन भएको विभागले जनाएको छ । ठूला भनिएका यस्ता होटल नै उपभोक्ताको हित विपरीत काम लागेको भन्दै विभागले थप अनुसन्धान र अनुगमनलाई अगाडि बढाउने भएको छ ।