पत्नी एलिनासहित विकल पौडेलविरुद्ध राजश्व अनुसन्धान विभागले हाल्यो पौने २ अर्बको मुद्दा

१५ असोज, काठमाडौं । राजश्व अनुसन्धान विभागले गैरकानुनी रूपमा विदेशी बैंकमा रकम जम्मा गरेको अभियोगमा सुरक्षण मुद्रण केन्द्रका निलम्बित कार्यकारी निर्देशक विकल पौडेल र उनकी पत्नी एलिनाविरुद्ध झण्डै २ अर्ब बराबर जरिवाना माग गरी काठमाडौँ जिल्ला अदालतमा मुद्दा दायर गरेको छ ।

विभागले जारी गरेको सूचनाअनुसार पौडेलले गैरकानुनी रूपमा विदेशी बैंकमा सो रकम जम्मा गरेको पुष्टि भएकोले विदेशी विनिमय अपचलनसम्बन्धी मुद्दा दायर गरिएको हो । विभागले पौडेल तथा उनकी पत्नी एलिना बस्नेतसँग विदेशी विनिमय अपचलन कसुरमा करिब दुई अर्ब माग दाबी गरेको छ । विभागले पौडेलविरुद्ध बिगोको तीन गुना १ अर्ब ८३ त्रियासी करोड ३९ लाख ६३ हजार ४ सय ५९ रुपैयाँ माग दाबी लिन भनेको छ । 

विदेशी मुद्रा अपचलन गरेको पुष्टि भएको आधारमा ६१ करोड १३ लाख २१ हजार १५३ रुपैयाँ २० पैसा  बिगो कायम हुन आएको र विदेशी विनिमय (नियमित) गर्ने ऐन २०१९ को दफा १७ बमोजिम ३ गुनाले उक्त माग दाबी लिई काठमाडौँ जिल्ला अदालतमा मुद्दा दायर गरिएको जारी गरेको विज्ञप्तिमा जनाएको छ ।

यसअघि अख्तियारको अनुसन्धानले नै पौडेलले नेपाल राष्ट्र बैंकको अनुमति नलिई विदेशी बैंकमा खाता खोलेको, घुस र कमिसनवापतको रकम सोही खातामा जम्मा गर्न लगाउने र श्रीमतीको नाममा पठाउने गरेको फेला पारेको थियो। अख्तियारले थप अनुसन्धान गर्न विभागमा पत्राचार गरेको थियो । श्रीमती एलिना बस्नेत पनि विकल पौडेलको अवैध कारोबारमा संलग्न देखिएकोले उनका नाममा १ करोड ५२ लाख ७० हजार रूपैयाँ बिगो कायम गरिएको छ ।