कांग्रेस संसदीय दलमा गृहमन्त्रीः ८ टोली ८ जिल्ला पठाइएको छ, प्रहरीले काम गरेन भन्ने कुरा सत्य होइन

१५ असोज, काठमाडौं । गृहमन्त्री रमेश लेखकले  कांग्रेस संसदीय दलको बैठकमा बाढी–पहिरोबाट भएको मानवीय र भौतिक क्षतिको ब्रिफिङ गरेका छन् । मंगलबार दिउँसो नयाँ बानेश्वरस्थित ल्होत्से हलमा बसेको बैठकमा गृहमन्त्री लेखकले उद्धार, राहत र घाइतेको उपचारबारे जानकारी गराउँदै उद्धारमा प्रहरीले सहयोग गरेन भन्ने आरोप गलत भएको बताए । 

उनका अनुसार सरकारले ७ सयभन्दा बढी मानिसको हेलिकप्टरबाट उद्धार गरिएको छ । सरकारले तत्काल अस्थायी आवास निर्माण गर्ने र आगामी दिनमा स्थानी आवास बनाउने व्यवस्था मिलाइएको उनले बताए । क्षतिग्रस्त संरचनाको मर्मत गरि संचालनका लागि सरकारले काम अगाडि बढाएको गृहमन्त्री लेखकले बताए । 

गृहमन्त्री लेखकले गृह मन्त्रालयको सहसचिवको नेतृत्वमा सोमबार ८ वटा टोली बनाएर आजै क्षतिग्रस्त ८ जिल्लामा पठाइएको जानकारी दिए । यातायात संचालन गरी मूल्यवृद्धि नियन्त्रणका लागि सरकार सचेत रहेको बताउँदै नेपाली सेना, नेपाल प्रहरी र सशस्त्र प्रहरीले सडक संचालनका लागि काम गरिरहेको जानकारी दिए । गृहमन्त्री लेखकका अनुसार नख्खु खोलमा टिनको छाप्रोमा उद्धार गर्ने विषयमा सशस्त्र प्रहरी र नेपाल प्रहरी पठाइएको थियो । 

सशस्त्र प्रहरीको बोट पल्टिँदा उद्धारमा समस्या भएको भन्दै उनले त्यतिबेला नेपाली सेनाले हेलिकप्टर उठाउने भिजिविलिटी नभएको मलाई जानकारी आएको बताए । एक जना स्थानीयले उद्धार गरेपछि नेपाल प्रहरीकै गाडीमा अस्पताल लगिएको थियो । प्रहरीले सहयोग नगरेको भन्ने होइन,  उनले भने, चार हजार भन्दा बढीको सरकारले उद्धार गरेको छ । एउटा घटनालाई लिएर सरकारले केही गरेन भन्नू न्यायोचित हुँदैन । सरकारबाट अहिले पनि राहत र उद्धारको काम भइरहेको छ ।