कृषिमन्त्री अधिकारी भन्छन्, बाढी र पहिरोले ५८ हजार ४७६ हेक्टरमा लगाएको धान वाली नष्ट भयो

१६ असोज, काठमाडौं । कृषि तथा पशुपन्छी विकासमन्त्री रामनाथ अधिकारीले बाढी, पहिरो र डुुवानका कारण ५८ हजार ४७६ हेक्टरको धान वाली नष्ट भएको बताएका छन् । उनले पछिल्लो बाडी पहिरोको कारण करिब ६ अर्बको अन्नबालीमा नोक्सानी पुगेको बताएका छन् ।
 
कृषि समितिको आज बसेको बैठकमा उनले बाढीले कृषकलाई ठुलो क्षति पुर्याएको जानकारी दिए । नोक्सानी भएका किसानहरू पीडाले रोइरहेको र दसैँ कसरी मनाउने भन्ने चिन्ता बढेको बताए । पीडित किसानलाई कसरी राहत दिने भन्ने विषयमा छलफल भइरहेको उनले जानकारी दिए । यसमा सहयोग गर्न दातृसंस्थासँग अनुरोध गरिएको उनले जानकारी दिए । 

उनले ५८ हजार ४७६ हेक्टर धान वाली नष्ट भई ३ अर्ब ५० करोड बरावरको क्षति भएको बताए ।  सो क्षति सप्तरी, सिराहा, धनुषा, महोत्तरी, सर्लाही, रौतहट, बारा, पर्सा, नवलपुर, बागलुङ, खोटाङ, झापा, कैलाली, कास्की, स्याङ्जा, सिन्धुली, मकवानपुर र काभ्रेबाट सङ्कलन गरिएको छ । यस्तै, १३ सय हेक्टर अलैची नष्ट भई  ७० करोड रुपैयाँ बरावरको क्षति भएको छ ।  

धनुषा, महोत्तरी, सर्लाही, रौतहट, बारा, पर्साका ४५८ हेक्टर माछापोखरीको १ अर्ब १३ करोड रुपैयाँको क्षति भएको छ । यस्तै, पाँचथर, धनकुटा, तेह्रथुममा २४ पशु गोठमा क्षति पुगेको मन्त्रालयले जनाएको छ । बाढी पहिरोमा परी २६ हजार २०५ पशुपन्छी मृत्यु भएको छ ।  बाढी पहिरोका कारणले कृषि मन्त्रालय र मातहतको कार्यालयको भौतिक तथा अन्य संरचनाको १६ करोड बराबरको  क्षति भएको छ ।