ललितपुरको गुसिङगलमा दुर्गाको मूर्ति बनाउन व्यस्त कलिगण [ फोटो फिचर ]

१६ असोज, काठमाडौं । दशैं नजिकिएसँगै ललितपुरको गुसिङगलमा दुर्गाको मूर्ति बनाउन व्यस्त देखिन्छ ५८ वर्षीय बिकाउ पण्डित, उनीसँगै काम गर्ने अन्य कलिगण पनि व्यस्त छन् । ४१ वर्ष देखि मूर्ति बनाउन थालेका पण्डित अहिले पनि उस्तै फुर्तीका साथ काम गरी रहेको देखिन्छ । 

दशैमा दुर्गा, गणेश, कुमार र सरस्वतीको पूजा गर्ने प्रचलन रहेको हुनाले विभिन्न ठाउँबाट आएका अर्डरका मूर्ति बनाउन उनी सँगै अन्य कालिगणहरु व्यस्त छन् ।  घटस्थापनाको दिनदेखि नौ रातसम्म देवी दुर्गा भगवतीको विभिन्न स्वरूपको  पूजा आराधना गरिने हुँदा उनीहरू निकै व्यस्त देखिन्छ ।  दशैंको बेला माटो आदिबाट बनाइएका दुर्गा भगवतीको मूर्ति सजाएर पूजा गर्ने प्रचलन जताततै बढेको कारण हाम्रो काम पनि बढेको पण्डित बताउँछन् ।

मूर्तिको आकार र सेट अनुसार जसमा  (दुर्गा, गणेश, कुमार र सरस्वती)  मूर्ति हुने मूल्य चाहिँ ६० हजार देखि ७० हजार सम्म बिक्री हुने पण्डित बताउँछ ।

घटस्थापनाका दिन दुर्गा भगवतीको मूर्ति स्थापना गरेर सप्तमीमा  आँखाबाट पट्टी खोल्ने काम हुन्छ । महिषासुरलाई सप्तमीको दिन दुर्गा भवानीले मारेको हुनाले सो दिन मूर्तिको आँखा खोल्ने परम्परा छ । त्यसपछि दशमीको दिन दुर्गा भवानीको मूर्तिलाई नजिकैको नदीमा लगेर विसर्जन गरिन्छ ।