महानिर्देशक अधिकारीमाथि अनुसन्धान जारीरहेकै बेला नागरिक उड्डयन कार्यालयमा अख्तियारको छापा

१६ असोज, काठमाडौं । नेपाल नागरिक उड्डयन प्राधिकरणका महानिर्देशक प्रदीप अधिकारीमाथि छानविन चलिरहेका बेला अख्तियार दुरुपयोग अनुसन्धान आयोगको टोलीले सिनामंगलस्थित प्राधिकरणको कार्यालयमा छापा मारेर केही कागजातहरू बरामद गरेको छ । प्राधिकरणमा अनियमितता भएको आशंकामा अनुसन्धान गरिरहेको टोलीले प्राधिकरणबाट महत्वपूर्ण कागजात लिएको छ । 

प्राधिकरणमा अनियमितता भएको आशंकामा अनुसन्धान गरिरहेको अख्तियारको टोलीले बुधबार छापा मारेको हो । विभिन्न विमानस्थल निर्माणको परियोजना र नागरिक उड्डयन प्राधिकरणको भवन निर्माणका क्रममा अनियमितता भएको उजुरी अख्तियारमा परेको थियो । 

सोही उजुरीको अनुसन्धानको सिलसिलामा आवश्यक कागजात उपलब्ध नगराएपछि छापा मारेको अख्तियार स्रोतको भनाइ छ । अनियमिततामा संलग्न भएको आशंकामा अख्तियारले यसअघिबाटै प्राधिकरणका महानिर्देशक प्रदीप अधिकारीमाथि अनुसन्धान गरिरहेको छ । 

अख्तियारले क्यान र क्यानको सिनामंगलस्थित कार्यालयमा छापा मारेको हो । अख्तियारको टोली बिहान १० बजे नै क्यानको कार्यालय पुगेको थियो । पोखरा अन्तर्राष्ट्रिय विमानस्थल निर्माण गर्दा अनियमितता भएको भन्दै संसदको सार्वजनिक लेखा समितिले पनि क्यानका महानिर्देशक प्रदीप अधिकारीलगायत पदाधिकारीमाथि छानबिन गरिरहेको छ ।