संसदीय सुनुवाइ समितिद्वारा प्रधानन्यायाधीशमा प्रकाशमानसिंह राउतको नाम अनुमोदन

१६ असोज, काठमाडौं । संसदीय सुनुवाइ समितिले प्रधानन्यायाधीशमा प्रकाशमानसिंह राउतको नाम अनुमोदन गरेको छ । बुधवार बसेको समितिको बैठकले सर्वोच्च अदालतको प्रधानन्यायाधीशमा राउतको  अनुमोदन गरेको हो ।

आज भएको सुनुवाइमा राउतले न्याय परिषद् नियमावली संशोधनलाई लिएर भइरहेको विवादको वैधानिक निकास दिने बताएका थिए । न्याय परिषद् नियमावलीमा २०८० असोज १ मा गरिएको संशोधनलाई लिएर नेपाल बार एसोसिएसन विरोधमा उत्रिएको छ । यसबारे उनले मिलाएर लाने बताएका थिए । 

नियमावलीमा गरिएको संशोधनअनुसार न्यायाधीश सिफारिस गरेको विरोधमा बोलेपछि बारका अध्यक्ष वरिष्ठ अधिवक्ता गोपालकृष्ण घिमिरेविरुद्ध सर्वोच्च अदालतले अवहेलनाको मुद्दा अगाडि बढाएको छ ।

समितिमा सांसदहरूले न्याय परिषद् नियमावली संशोधन र त्यसले ल्याएको बार र बेन्च बीचको विवादको प्रश्न उठाएका थिए । प्रधानन्यायाधीश प्रस्तावित राउतको बुधबार भएको सुनुवाइमा सत्ता र प्रतिपक्षका सांसदहरूले न्याय परिषद् नियमावली विवाद समाधान गरी बार र बेन्च बीचको सम्बन्ध सुधार्ने के कार्ययोजना छ ? भनी सोधेका थिए ।

जवाफमा राउतले न्याय, परिषद् नियमावलीको मुख्य रजिस्ट्रार र रजिस्ट्रार न्यायाधीश सिफारिस हुँदा कुन मर्यादा क्रममा रहने भन्ने विषयमा मात्रै रहेको जानकारी दिए । उनीहरूलाई न्यायाधीश नियुक्त गर्दा मर्यादाक्रम के हुने भन्ने अभ्यासका आधारमा चलेको भए पनि हुने उनको भनाइ थियो ।  नियमावलीलाई गत वर्ष असोज १ मा संशोधन गरी न्यायाधीशहरूको वरिष्ठताको रोलक्रम परिवर्तन गरिएको थियो ।

त्यसमा मुख्य रजिस्ट्रारको पदमा कार्यरत रही उच्च अदालतको न्यायाधीश नियुक्त व्यक्ति मुख्य न्यायाधीशपछि र न्याय सेवाको राजपत्रांकित विशिष्ट श्रेणीको पदमा कार्यरत रही उच्च अदालतको न्यायाधीश नियुक्त व्यक्ति निज विशिष्ट श्रेणीको पदमा नियुक्ति भएको मितिभन्दा पछि उच्चको न्यायाधीशमा नियुक्त व्यक्तिभन्दा अगाडि रहने व्यवस्था छ । उनले न्यायालयमा सुधार गरेर लाने बताएका थिए । 

 उदयपुर घर भएका राउत कानुन व्यवसायी पृष्ठभूमिका हन् । उनी ०७३ साउनमा सर्वोच्चको न्यायाधीश नियुक्त भएका थिए । संवैधानिक परिषद्को गत भदौ ३१ मा प्रधानन्यायाधीशमा राउतलाई सिफारिस गरेको थियो ।