तीन पेट्रोलियम परियोजना निर्माण गर्न निगम र आइओसीबीच १५ अर्ब अनुदान सम्झौतामा हस्ताक्षर

१७ असोज, काठमाडौं । नेपाल आयल निगम र इन्डियन आयल कर्पोरेसन (आइओसी) बीच भारतले दिने १५ अर्ब रुपैयाँ अनुदानमा तीन ठूला पेट्रोलियम परियोजना निर्माण गर्न दिल्लीमा सम्झौता भएको छ । दोस्रो चरणको पाइपलाइन विस्तारका लागि आयल निगम र आयल कर्पोरेसनबीच सम्झौता भएको हो । 

बिहिबार दिल्लीमा आयोजित एक कार्यक्रममा नेपाल आयल निगमका कार्यकारी निर्देशक चण्डिका प्रसाद भट्ट र आइओसीका पाइपलाइन निर्देशक सिम्थल कुमारले सम्झौता पत्रमा हस्ताक्षर गरेको निगमका नायब कार्यकारी निर्देशक वीरेन्द्र गोइतले जानकारी दिएका छन् । उनका अनुसार अमलेखगन्ज–चितवन र सिलगुढी–झापा पाइपलाइन तथा झापामा ४० हजार किलोलिटरभन्दा बढी क्षमताको भण्डारणगृह भारतीय अनुदानमा निर्माण गर्न सम्झौता भएको हो ।

आइओसीका माध्यमबाट भारत सरकारले ९ अर्ब ३७ करोड भारु (१४ अर्ब ९९ करोड २० लाख नेपाली रुपैयाँ) खर्चने गरी नेपालमा तीन ठुला परियोजना निर्माण गर्न सम्झौता सम्पन्न भएको हो । चितवनमा निगमले नै निर्माण गर्ने करिब एक लाख किलोलिटर क्षमताको भण्डारणगृहमा आइओसीले प्राविधिक सहयोग गर्ने पनि सम्झौता भएको छ ।