अर्थ मन्त्रालयमा धितोपत्र बोर्ड अध्यक्षका लागि सर्ट लिष्टमा परेका तीन जनाको अन्तर्वार्ता

१८ असोज, काठमाडौं । धितोपत्र बोर्डको अध्यक्षका लागि तय गरिएको अन्तर्वार्तामा आज तीनै जना सहभागी भएका छन् । बोर्डको अध्यक्ष नियुक्ति गर्ने प्रयोजनका निमित्त नाम सिफारिस गर्न गठित सिफारिस समितिले पुनः सूचना निकालेर आज असोज १८ गते बिहान ८ बजे अन्तर्वार्ताका लागि बोलाएको थियो ।

अन्तर्वार्ता दिन नेपाल स्टक एक्सचेन्ज (नेप्से)का प्रमुख कार्यकारी अधिकारी कृष्णबहादुर कार्की, धितोत्रप बोर्डका कार्यकारी निर्देशक नवराज अधिकारी र नेपाल बिमा प्राधिकरण (तत्कालीन बिमा समिति)का अध्यक्ष चिरञ्जीवी चापागाईं अर्थ मन्त्रालय गएका छन् । अन्तर्वार्ताका लाग उनीहरू अर्थ मन्त्रालयमा पुगेका हुन् ।

यसअघि तीन जनाकै कारण बोर्डको अध्यक्ष नियुक्तिमा ढिलाइ भएको थियो । बोर्ड गत पुस २१ गतेबाट कार्यकारी अध्यक्षको भरमा छ । पूर्णकालीन अध्यक्ष नहुँदा बोर्डका कामकारबाहीमा प्रत्यक्ष असर परेको छ ।