खाद्यले दशैंका लागि ल्याएका खसीबोकाको मूल्य प्रतिकेजी ६७० र च्यांग्राको १२३०, भोलिदेखि बिक्री गर्ने

१९ असोज, काठमाडौं । खाद्य व्यवस्था तथा व्यापार कम्पनी लिमिटेडले काठमाडौं उपत्यकामा दशैंका लागि खसी बोका भित्र्याएको छ । कम्पनीले आइतबारदेखि किलोमा १० रुपैयाँ छुटसहित खसी, बोका र च्याङ्ग्रा बेच्ने भएको छ । खसी बोका र च्याङ्‍ग्रालाई संस्थानको कार्यालय थापाथलीमा ल्याएको छ । 

हरेक वर्षजस्तै आइतबारदेखि सहुलियत मूल्यमा बिक्री सुरु गर्ने तयारी कम्पनीको छ । यस वर्षका जिउँदो खसी बोकाको मूल्य ६७० रुपैयाँ प्रतिकेजी निर्धारण गरिएको छ भने च्याङ्‍ग्राको १२३० तोकिएको छ । यो मूल्यमा १० प्रतिशत छुट दिइने कम्पनीले जनाएको छ ।

शनिबार खसी बोका थापाथलीमा झारिएका हुन् । यो वर्ष एक हजारदेखि बढीमा १५ सय वटा खसी बोका र ३०० कालो च्याङ्ग्रा बेच्ने तयारी कम्पनीको छ । खाद्य व्यवस्था तथा व्यापार कम्पनी लिमिटेडले दसैँमा बेच्नका लागि मकवानपुरबाट २०८ वटा  खसी बोका ल्याइएको हो ।