सशस्त्रमा एसपीको सेवा अवधि फिर्ता : नेपाल प्रहरीमा ३० वर्षे हट्यो, १६ वर्षमा पेन्सन

२१ भदौ, काठमाडौं । सरकारले नेपाल प्रहरीसम्बन्धी कानुनलाई संशोधन तथा एकीकरण गर्न बनेको विधेयक र सशस्त्र प्रहरी बल, नेपालसम्बन्धी कानुनलाई संशोधन तथा एकीकरण गर्न बनेको विधेयक उपर लोक सेवा आयोगको परामर्श लिन स्वीकृति दिएको छ । गृह, अर्थ र कानुन मन्त्रालयबाट प्रधानमन्त्री कार्यालयमा पुगेको सो विधेयकको मस्यौदालाई परामर्श र स्वीकृति लिनका लागि लोकसेवा पठाउन लागिएको हो । 

विधेयकमा सशस्त्र प्रहरीको एसपीको सेवा अवधि गायव भएकोमा कानुन मन्त्रालयले फिर्ता गरेको छ । अब एसपीको सेवा अवधि ८ वर्ष कायम गरिएको छ । साथै एसएसपीको सेवाअवधि ६ वर्ष कायम गरिएको स्रोतले जनाएको छ । यसअघि  एसएसपीको सेवा अवधि ८ वर्ष बनाइएको थियो । स्रोतका अनुसार नेपाल प्रहरीतर्फ भने ३० वर्षे सेवा अवधि तीन चरणमा हटाउने प्रस्ताव गरिएको छ । पहिलो चरणमा ६ महिना र दोस्रो चरणमा एक वर्ष र तेस्रो चरणमा डेढ वर्ष गरी तीन चरणमा हटाउने प्रस्ताव गरिएको छ । 

यसैगरी नेपाल प्रहरी र सशस्त्र दुवैमा सेवा प्रवेश गरेको १६ वर्षमै पेन्सन हुने सुविधा राखिएको छ । यसअघि प्रहरी प्रधान कार्यालयले माग गर्दै आएको १६ वर्षमै पेन्सनको व्यवस्थालाई ऐनको मस्यौदामा राखिएको छ । १६ वर्षदेखि अहिले कायम रहेको २० वर्षमा पेन्सन हुने उल्लेख छ । प्रहरी कार्यालय सहयोगदेखि वरिष्ठ हवल्दारका कर्मचारीसम्मको हकमा सेवा प्रवेश गरेको १६ वर्षमै पेन्सन हुनेछ ।  १६ वर्षमै पेन्सन हुनेमा कार्यालय सहयोगी, प्रहरी जवान, सहायक हवल्दार, हवल्दार र वरिष्ठ हवल्दार पर्छन् ।

त्यसैगरी प्रहरी सहायक निरीक्षक 'असई', प्रहरी नायव निरीक्षक 'सई' र वरिष्ठ सईको हकमा भने सेवा प्रवेश गरेको १८ वर्ष पूरा भएपछि पेन्सन हुनेछ । प्रहरी निरीक्षक 'इन्स्पेक्टर' भन्दा माथिल्लो दर्जाका प्रहरीको हकमा भने अहिले कायमै रहेको सेवा प्रवेश गरेको २० वर्षमा पेन्सन हुने व्यवस्था समेटिएको छ । १६ र १८ वर्षमा पेन्सन हुने व्यवस्थाको भएपनि जागिर छाड्दा पाउने सुविधा तथा पेन्सन भने २० वर्ष पूरा भएपछि मात्रै पाउने छन् ।