बाढीपहिरो प्रभावितहरुको खोजी, उद्धार तथा राहत वितरणमा तीनवटै सुरक्षा निकाय सक्रिय छनः गृहमन्त्री

२१ असोज, काठमाडौं । गृहमन्त्री रमेश लेखकले बाढीपहिरोबाट प्रभावितहरुको  खोजी, उद्धार तथा राहत वितरण कार्यमा तनिवटै सुरक्षा निकाय सक्रिय रुपमा लागेको बताएका छन् । उनले उद्धार, राहत वितरण, पुनःस्थापना र पुनर्निर्माणको सम्पूर्ण काम सरकारले गरिरहेको बताएका छन् । 

सोमबार, बाढीपहिरोबाट प्रभावित काभ्रेको पनौती नगरपालिका–१२ स्थित कलाँती र बेथानचोक गाउँपालिकाको–४ स्थित चलालगणेशस्थानको स्थलगत अनुगमन गर्दै गृहमन्त्री लेखकले बाढीपहिरो प्रभावितको खोजी उद्धार, राहत विरण, पुनःस्थापना र पुनर्निर्माणको सम्पूर्ण काम सरकारले गर्ने बताए ।

उनले भने, ‘प्राकृति विपत्तिले भएको क्षतिमा सरकार पीडामा छ, पीडाको बेलामा सरकारले गम्भीरतापूर्वक काम गर्नेछ, यहाँ तत्काल राहत वितरण, पूर्वाधार विकास, नागरिकका आधारभूत आवश्यकता, यस विपत्तिका कारण निम्तिन सक्ने महामारीजन्य रोगहरुको नियन्त्रणका लागि काम गर्न आवश्यक देखिएको छ ।’ सरकारले पहिलो चरणमा राहत वितरणलाई प्राथमिकतामा राखेर काम उनले बताए ।

स्थलगत अनुगमनमा बाढीपहिरोमा परेर धेरै घरबारबिहीन भएको अवस्था आफूले देखेको बताउँदै उनले भने, ‘बासस्थान नभएका ५ जनासम्मको परिवारलाई १५ हजार, ५ जनाभन्दामाथिका परिवार भएकालाई २० हजार रुपैयाँ सरकारले तत्कालै वितरण गर्नेछ, यसको लागि स्थानीय तहका जनप्रतिनिधिले लाभग्राहीको विवरण संकलन गरेर सरकारलाई पठाउनुपर्नेछ, यहाँ प्राप्त विवरणको आधारमा सरकारले ३ दिनभित्र रकम व्यवस्थापन गर्नेछ ।’

सडक सञ्चार, बिजुली, दूरसञ्चार, खानेपानी व्यवस्थापन लगायतका नागरिकको आधारभूत आवश्यकताको व्यवस्थापनमा सरकारले काम गर्ने उनले बताए । उनका अनुसार यससँगै स्वास्थ्य सेवा व्यवस्थापन र विपत्तिका कारण निम्तिन सक्ने महामारीजन्य रोगहरुको नियन्त्रणका लागि काम गर्ने सरकारले योजना बनाएको छ ।