नोबेल जित्नु ‘भूकम्प’ जस्तै– रुभ्कन

२१ असोज, स्टकहोम । माइक्रोआरएनए पत्ता लगाउने अमेरिकी वैज्ञानिक ग्यारी रुभ्कनले अर्का अमेरिकी भिक्टर एम्ब्रोसका साथमा सोमबार चिकित्सा शास्त्रतर्फको नोबेल पुरस्कार जितेका छन् ।

रुभ्कनले यो सम्मान जित्नु ‘भूकम्प’ जस्तै भएको बताए । “यो ठूलो कुरा हो, यो ठूलो भूकम्प जस्तै हो”, ७२ वर्षीय हार्वर्ड मेडिकल स्कुलका प्राध्यापक रुभ्कनले स्टकहोममा पुरस्कार घोषणा गरिएलगत्तै स्विडिश सार्वजनिक रेडियो एसआरएलाई भने । 

सोमबार बिहान अमेरिकामा नोबेल पुरस्कार समितिको फोनले उनको निद्रा खुलेको थियो । “बाहिर अँध्यारो छ र हामी घरभरि दौडिरहेका छाैँ भनेर कुकुर अलमलमा परेको छ”, उनले भने । 

उनले डिसेम्बर १० मा स्टकहोममा हुने नोबेल पुरस्कार वितरण समारोहमा सहभागी हुन उत्सुक रहेको बताए । स्टकहोममा स्विडेनका राजा कार्ल सोह्रौँबाट विजेताहरूले पुरस्कार ग्रहण गर्नेछन् । 

उनले पहिला पनि ‘केही पटक’ उक्त समारोहमा सहभागिता जनाएको बताए । “यो एउटा पार्टी हो, तपाईँहरू वैज्ञानिकहरूको समूहलाई पार्टी गर्ने जनावरहरू जस्तो सोच्नुहुन्न तर हामी साँच्चै हौँ”, उनले भने ।

नोबेल समितिले एम्ब्रोसलाई सम्पर्क गर्न भने सकेन । उनले पुरस्कृत भएको समाचार एसआरएका एक रिपोर्टरको फोनबाट थाहा पाए । 

“वाह १ यो अविश्वसनीय छ, मलाई थाहा थिएन”, म्यासाचुसेट्स मेडिकल स्कूलका ७० वर्षीय प्राध्यापक एम्ब्रोसले भने, “राम्रो, अद्भुत ।” नोबेल पुरस्कारमा एउटा डिप्लोमा, एउटा सुनको पदक र दुई जनाले बाँड्नुपर्ने १० लाख डलरको चेक समावेश छ । 

सहकार्य गर्दै तर अलग–अलग काम गर्दै उनीहरूले माइक्रोआरएनए पत्ता लगाए । माइक्रोआरएनए साना आरएनए अणुहरूको नयाँ वर्ग हो । यसले नियमनमा महत्त्वपूर्ण भूमिका निर्वाह गर्छ र बदलामा प्रत्येक कोशिकालाई सान्दर्भिक निर्देशनहरू मात्र छनोट गर्न अनुमति दिन्छ । गलत तरिकाले हुने जिन नियमनले क्यान्सर र मधुमेह जस्ता गम्भीर रोग निम्त्याउन सक्छ ।