कान्ति लोकपथसँगै आजदेखि काठमाडौंबाट हेटौंडा जाने सबै सडक खुले, ठूला सवारीलाई अनुमति छैन

२२ असोज, हेटौंडा । मकवानपुर र ललितपुर जोड्ने बगुवाको बागमती पुलमा अस्थायी सडक बनाएर कान्ति लोकपथ सञ्चालनमा ल्याइएको छ । यससँगै हेटौंडा र काठमाडौंलाई जोड्ने आधा दर्जन मार्ग सबै सन्चालनमा आएका छन् । मंगलबार बिहानबाट हेटौंडा–ठिंगन हुँदै टीकाभैरव जोड्ने कान्ति लोकपथ पूर्णरुपमा सञ्चालनमा आएसँगै वर्षाले अवरुद्ध भएको सम्पूर्ण सडक १० दिनभित्रमा सञ्चालनमा आएका हुन् ।

१२ असोजको बाढीले बागमती पुलको आधा भाग बगाएको थियो । ललितपुर तर्फको सडक यसअघि नै सुचारू भए पनि बागमती खोलामा पुल बगाएकाले कान्ति लोकपथ अवरुद्ध थियो । द्रुत मार्ग निर्माण गरिरहेको नेपाली सेनाको सहयोग लिएर मकवानपुरको भीमफेदी गाउँपालिका र ललितपुरको बागमती गाउँपालिकाले बगुवामा ४ वटा ह्युमपाइप हालेर अस्थायी सडक बनाएका छन् ।

भीमफेदी गाउँपालिका अध्यक्ष हिदम लामाले मंगलबार बिहानबाट हलुका सवारी चल्न थालेको जानकारी दिए । बागमती गाउँपालिकाका स्थानीय प्रकाश लामाका अनुसार त्यहाँनेर सडक साँघुरो र एकतर्फी भएकाले हलुका सवारी मात्रै सञ्चालन गरिएको छ ।

सोमबारदेखि बाढीपहिरोका कारण नौ दिनदेखि अवरुद्ध हेटौंडा—भीमफेदी—कुलेखानी—फाखेल—फर्पिङ र हेटौंडा—भीमफेदी—कुलेखानी–सिस्नेरी–दक्षिणकाली सडक सञ्चालनमा आएका थिए । वाग्मती प्रदेशको यातायात पूर्वाधार निर्देशनालय, नेपाली सेना, सशस्त्र प्रहरी, नेपाल प्रहरी–प्रशासन र स्थानीय एवं जनप्रतिनिधिको सक्रियतामा मर्मत सम्भार गरेर यी सडक सञ्चालनमा ल्याइएको हो ।

हेटौंडाबाट–भैंसे–टिष्टुङ हुँदै त्रिभुवन राजपथको नौबिसे सडक खण्ड बन्द भएको तेस्रो दिनबाट सञ्चालनमा आएको थियो । संघीय राजधानीसँगको पहुँच मार्ग अवरुद्ध हुँदा हेटौंडा–टिष्टुङ–चित्लाङ हुँदै चन्द्रागिरिको लामो र अप्ठ्यारो बाटो हुँदै हेटौंडा–काठमाडौं आउजाउ गरिँदै आएको थियो । 

हाललाई जिल्ला विपद् व्यवस्थापन समितिले फाखेल, सिस्नेरी र कान्ति लोकपथको बाटोमा साना सवारीलाई मात्र आउजाउ गर्न दिएको छ । बुधबारबाट कान्ति लोकपथको बाटो ठूला सवारी सञ्चालन गर्न दिने तयारीमा आफूहरू रहेको जिल्ला प्रहरी कार्यालय मकवानपुरका प्रमुख उपरीक्षक विश्वराज खड्काले जानकारी दिए ।

उनका अनुसार ठूला सवारीलाई हाल नारायणघाट–मुग्लिन र हेटौंडा–टिष्टुङ–नौबिसे सडक खण्डको प्रयोग गर्न भनिएको छ । उनका अनुसार भर्खरै मात्र बाढीपहिरोले अवरुद्ध भएको सडक मर्मत गरी सञ्चालनमा ल्याइएको कारण तत्काललाई ठूला सवारी आउजाउलाई अनुमति नदिइएको हो । फाखेल, सिस्नेरी र कान्ति लोकपथ भएर सोमबारमात्र १३ सयभन्दा बढी सवारी साधन हेटौंडा आउजाउ गरेको जिल्ला ट्राफिक प्रहरी कार्यालय मकवानपुरले जनाएको छ ।