अलौमा मेयर सिंहमाथि हातपातः डुबान समस्याका कारण स्थानीयको आक्रोश

२२ असोज, वीरगञ्ज । वीरगञ्जतिर सोमबार सामाजिक सञ्जालमा एउटा भिडियो क्लिपले चर्चा पायो । उक्त १३ सेकेन्डको भिडियोमा वीरगञ्ज महानगरपालिकाका प्रमुख राजेशमान सिंहमाथि हातपात भएको देख्न सकिन्छ ।

रोशन गुप्ता नामक फेसबुक आईडीको स्टोरीमा राखिएको भिडियोको स्क्रिन रेकर्ड गरेर ई. रमेश यादवको आईडीबाट भिडियो सार्वजनिक भएको छ । नेपाल विद्यार्थी संघ (नेविसंघ) पर्साका अध्यक्षसमेत रहेका यादवको आईडीबाट सार्वजनिक भिडियोलाई यो समाचार तयार पार्दासम्म १३ हजार भन्दा धेरै पटक हेरिएको छ । 

महानगर प्रमुखमाथि आक्रमणको कारण 
वीरगञ्ज महानगरपालिका वडा नम्बर १७ अलौमा केही दिन अघि परेको अबिरल वर्षाका कारण डुबान परेको थियो । उक्त डुबानका कारण अहिलेसम्म पदमरोडदेखि दक्षिण अलौ र पदम रोडदेखि उत्तर अठराह सुगौलीका जनताको जनजीवन कष्टकर बनेको छ । 

केही समय अघिसम्म दुबैतिर नहर थियो, जसका कारण पानीको सहज रुपमा निकास हुँदा डुबानको असर पर्दैनथ्यो । तर एकीकृत सुरक्षा जाँच चौकी (आईसीपी) बनाउने बेला उक्त नहर पुरिएपछि वर्षातको समयमा सो क्षेत्रका जनताले सास्ती खेप्नुपर्छ ।

गत असोज ११ र १२ गते आएको अविरल वर्षाले पनि अठराह सुगौली र अलौमा असर गरेको छ । सोही पानीको निकासका लागि अठराह सुगौलीका गाउँलेले पानीको निकास गरि पाउँ भन्दै महानगरपालिकामा निवेदन दिएका थिए । 

वीरगञ्ज महानगरपालिकाका प्रमुख राजेशमान सिंहले भने वडा नम्बर १७ र २६ दुवै वडाका जनप्रतिनिधिलाई नै सो समस्या सुल्झाउने जिम्मा दिए । सोही बमोजिम वडाअध्यक्षहरूले समस्या समाधानका लागि छलफल गरेपनि तत्कालै सम्भव नदेखिएको वीरगञ्ज १७ का वडाअध्यक्ष सञ्जीव बहादुर क्षेत्रीले बताए । उनका अनुसार वडा नम्बर १७ कै वडा सदस्य आमोद यादवले भने जमेको पानी अलौतिर फर्काएका थिए । 

त्यसपछि उक्त पानीले घरखेतमा र बालीनालीमा असर गरेको भन्दै वडाअध्यक्ष क्षेत्रीले पुनः पहिलेकै ठाउँमा पानीको बहाव परिवर्तन गरे । जसका कारण उक्त क्षेत्रमा  विवाद उत्पन्न भएको थियो । 

सोही अवस्थाको अनुगमन गर्ने र समस्या समाधानका लागि सरसल्लाह गर्ने मनसायका साथ सोमबार बिहान महानगर प्रमुख सिंह अलौ पुगेका थिए । अलौ पुगेर समस्या समाधानका लागि सरसल्लाह गर्ने क्रममा विवाद भएको प्रत्यक्षदर्शीले बताए । 

स्थानीय नेपाली कांग्रेसका युवा नेता समेत रहेका सुदर्शन लामिछाने लगायतले मेयर सिंहलाई धकेल्दै लगेको भिडियोमा देखिन्छ । यद्यपि त्यसअघि मेयर सिंहले आफ्नो बुबाप्रति अपशब्द बोल्दै कठालो समात्दै हातपात गर्ने प्रयास गरेको सुदर्शनका भाई रोशन लामिछानेको आरोप छ । 

यता महानगर प्रमुख भने आफू सभ्य रुपमा पेश हुँदा पनि नगर प्रहरीमाथि र आफ्नो कुर्ताको टाँक (बटन) चुँडाइदिएको प्रतिक्रिया दिए । सुदर्शन लामिछाने नेपाली कांग्रेसका बुथ सभापतिका छोरा हुन् ।