सरकारको दावीः सडक विभाग र सेना खटिएको छ, एक हप्ताभित्र बीपी राजमार्गमा सवारी चल्छ

२२ असोज, काठमाडौं । सरकारले एक हप्ताभित्रमा बीपी राजमार्गमा सवारी साधन चलाउने दावी गरेको छ । बाढीपहिरोले अवरुद्ध विपी राजमार्ग एक हप्ताभित्र अस्थायी रूपमा संचालनमा आउने जानकारी गृहमन्त्री रमेश लेखकले दिएका हुन् । उनीसहित अन्य दुई मन्त्री सेनाको हेलिकोप्टर चढेर मंगलबार बिहान सिन्धुली पुगेका थिए ।   

बाढीपहिरो प्रभावित जिल्लाको स्थलगत अवलोकनका क्रममा सिन्धुलीको खुर्कोट पुगेका मन्त्री लेखकले सडक विभाग र सेनाले राजमार्ग खुलाउने कार्य गरिरहेको जानकारी दिए । लेखकले अबको एक साताभित्र डाइभर्जनसहित विपद्का कारण अवरुद्ध बीपी राजमार्गमा सवारी चलाउने व्यवस्था गरिने बताए । 

सिन्धुलीको प्रभावित क्षेत्रको निरीक्षणपछि आयोजित कार्यक्रममा लेखकले भारी वर्षाका कारण आएको विपद्बाट सबैभन्दा बढी क्षति भएको वीपी राजमार्ग अस्थायी रुपमा सञ्चालनमा ल्याउन सडक विभाग र नेपाली सेना खटिएको जानकारी दिए ।

विपद् प्रभावितलाई राहत उपलब्ध गराउन सरकार लागिपरेको पनि मन्त्री लेखकले बताए । जतिसक्दो चाँडो यो समस्याबाट पार पाउन सबै एकजुट हुनुपर्नेमा पनि उनको जोड थियो । ’यो समस्यामा कहाँ जाउला ? के गरुँला ? यो नसोच्नुहोला,’ लेखकले प्रभावितहरूलाई भने, ’सरकार छ, सरकार भनेको सबैको अभिभावक पनि हो ।’

विपद् प्रभावितहरूलाई राहत दिनमा कुनै राजनीति नहुने पनि लेखकले बताए । पालिकाहरुलाई तत्काल लाभग्राही विवरण पठाउन उनले आग्रह गरे । लाभग्राहीको विवरण आएको तीन दिनभित्र तत्काल राहतका लागि रु १५ देखि २० हजार र अस्थायी आवास निर्माणमा पहिलो किस्ता स्वरूप २५ हजार दिन्छौं । त्यसका लागि प्रभावित जिल्लाका पालिकाहरूले चाँडो लाभग्राही विवरण पठाइदिनुपर्याे, उनले भने । 

सिन्धुली, सिन्धुपाल्चोक र ललितपुरको केही क्षेत्रमा गृहमन्त्री लेखकसँगै भौतिक पूर्वाधार तथा यातायात मन्त्री देवेन्द्र दाहाल, रक्षामन्त्री मानवीर राई र प्रधानसेनापति अशोकराज सिग्देलसहितको टोली बाढीपहिरो प्रभावित क्षेत्रको अनुगमन गरिरहेको छ ।