इन्स्पेक्टर शाही निलम्बन प्रकरणमा एसपी थापामाथि पनि अनुसन्धान हुँदैछ ?

२६ असोज, काठमाडौं । आर्थिक रुपमा ‘विवादित’ इन्सपेक्टर बिनुकुमारी शाहीमाथि मुद्धा चलाउनु पर्ने रायसहितको प्रतिवेदन प्रहरी प्रधान कार्यालयमा पठाइएको छ । दुई दिन अघि मात्रै सो प्रतिवेदन प्रहरी प्रधानकार्यालय पठाइएको उपत्यका प्रहरी कार्यालय रानीपोखरी स्रोतले जनाएको छ ।

‘दशै विदामै सो प्रतिवेदन आवश्यक कारवाहीको लागि पठाइएको हो’, उपत्यका प्रहरी कार्यालयका एक अधिकारीले भने ।  असोज २४ मा पठाइएको भएपनि दशैँपछि मात्रै शाहीमाथिको कारवाही अघि बढ्नेछ । छानबिन सकाएर बुझाइएको समितिको प्रतिवेदन उपत्यका प्रहरी कार्यालय रानीपोखरी हुँदै प्रहरी प्रधान कार्यालय पुगेको हो ।

छानबिन समितिले शाहीमाथि कारबाही सिफारिस गरेको स्रोतले जनाएको छ । इटहरीका एक व्यवसायीलाई ‘हनी ट्रयाप’मा पारेर ३० लाख रुपैयाँ असुल गरेको घटनामा शाहीलाई नै मुद्दा चलाउनुपर्ने रायसहित छानबिन समितिले प्रतिवेदन बुझाएको हो । ललितपुरका प्रहरी नायव उपरीक्षक (डीएसपी) नरहरि अधिकारी नेतृत्वको छानबिन समितिले तत्कालीन भैँसेपाटी प्रहरी प्रभागका प्रमुख समेत रहेकी इन्स्पेक्टर बिनुकुमारी शाहीलाई मुद्दा चलाउने आधार देखिएको भन्दै सोही सिफारिस गरेको जनाइएको छ । घटनामा शाहीको भूमिका शंकास्पद देखिएपछि समितिले यसअघि निलम्बन गर्न सिफारिस गरेको थियो । हाल उनी निलम्बित छन् ।

असोज ६ गते इटहरीका ताज स्लाम र दर्शन पोखरेलको योजनामा सुस्मा विकले एक व्यवसायीलाई ३० लाख नदिए बलात्कार मुद्दामा फसाउने भन्दै प्रहरी नै प्रयोग गरी रकम असुल गरेका थिए । घटना लगत्तै बनेको समितिले मंगलबार प्रतिवेदन ललितपुरका प्रहरी प्रमुख एसएसपी शेखर खनाललाई बुझाएका थिए ।

ललितपुर प्रहरीले बुधबार प्रतिवेदन उपत्यका प्रहरी कार्यालय रानीपोखरी बुझाएको थियो । त्यसपछि प्रतिवेदनमा देखिएका कुराको कार्यान्वयनका लागि प्रहरी प्रधान कार्यालय पठाइएको जनाइएको छ । प्रहरी थुनामा रहेका ताजसँग एसपी कमल थापाको समेत सम्बन्ध देखिएको प्रतिवेदनमा उल्लेख छ ।

उनीमाथि समेत छानबिन गर्नुपर्ने देखिएको रानीपोखरी प्रहरी स्रोतले जानकारी दियो । उनीमाथि पनि छानबिन गर्न हेडक्वार्टरले अर्को छानबिन समिति गठन गरेको स्रोतको दाबी छ । स्रोतका अनुसार एसएसपी दिपेन्द्र जिसीको नेतृत्वमा ५ सदस्यीय छानबिन समिति बनाएको छानबिन थालिएको हो । एसपी थापाको विषयमा थप अनुसन्धान गर्नुपर्ने देखिएकाले अर्को छानविन समिति बनाएको दावी गरिएपनि प्रहरी प्रधान कार्यालयले यो विषयलाई बाहिर ल्याएको छैन । त्यस घटनापछि एसपी थापाले इन्स्पेक्टर शाहीलाई पटक पटक फोनसम्पर्क गरेको देखिएको स्रोतको दावी छ  ।