पशुपति क्षेत्र विकास कोषले भन्यो- गौशाला धर्मशालामा मारवाडीको हक छैन, महानगरले माग्यो सुरक्षा

 २९ असोज, काठमाडौं । पशुपति क्षेत्र विकास कोषले गौशाला धर्मशाला विवादमा मारवाडी सेवा समितिको कुनै हक नलाग्ने बताएको छ । आफ्नो धारणा सार्वजनिक गर्दै कोषले २०२१ र २०४२ सालको नापी कतै पनि मोहीको ठाउँमा मारवाडी सेवा समितिको नाम उल्लेख नभएको जनाएको छ । 

कोषले मोहियानी हक नलाग्ने दाबी गरेको छ । कोषले मंगलबार पत्रकार सम्मेलन गरी ०५८ सालमा जिल्ला प्रशासन कार्यालय काठमाडौंमा दर्ता भएको मारवाडी सेवा समितिले १९९७ सालदेखि भोग चलन गरेको भनेर मोहियानी हक लाग्ने दाबी गर्न नमिल्ने धारणा सार्वजनिक गरेको हो ।

यसैबीच काठमाडौँ महानगरपालिकाले पशुपतिस्थित गौशाला रहेको धर्मशाला सञ्चालनका लागि जिल्ला प्रशासन कार्यालय काठमाडौँसँग शान्ति सुरक्षा माग गरेको छ । मंगलबार महानगरपालिकाले प्रशासन कार्यालय काठमाडौंलाई एक पत्र लेख्दै शान्ति सुरक्षासहित निर्णय कार्यान्वयनमा सहयोगका लागि अनुरोध गरेको हो ।

पत्रमा धर्मशालाको व्यवस्थापनको जिम्मेवारी महानगरपालिकाले पाएकाले उक्त सहमति बमोजिम धर्मशाला सञ्चालन तथा व्यवस्थापन गर्न शान्ति सुरक्षा सहित आवश्यक सहयोगका लागि अनुरोध गरिएको छ ।

पत्रमा भनिएको छ, ‘काठमाडौं महानगरपालिका नगर कार्यपालिकाबाट मिति २० २०८१÷०६÷०२ मा निर्णय भई पशुपति क्षेत्र विकास कोष र काठमाडौं महानगरपालिकाबीच पशुपति गौशाला धर्मशाला सञ्चालन÷व्यवस्थापन गर्न मिति २०८१÷०२÷२२ मा लिखित सहमति भएको हुँदा उक्त सहमतिपत्र सञ्चालन÷ व्यवस्थापन गर्न शान्ति सुरक्षासहित आवश्यक सहयोगका लागि देहायका लागि कागजातको छायाँप्रति संलग्न गरी अनुरोध गरिन्छ ।’