वैशाखमा जेलबाट रिहा भएका परियार मान्छेको टाउको काटेको अभियोगमा फेरी पक्राउ

२९ असोज बाँके । घाटी काटेर फरार भएका एक व्यक्तिलाई बाँके प्रहरीले पक्राउ गरी सार्वजनिक गरेको छ । दशैको टिन अर्थात असोज २६ गते राती बाँकेको कोहलपुर नगरपालिका ८ बंगला चोकस्थित भित्री सडकदेखी भित्रपट्टि कच्चि बाटोमा चन्द्रबहादुर कामीको हत्या भएको थियो । 

टाउको नभएको अवस्थामा ४० वर्षीय चन्द्रबहादुर कामीको शव फेला परेको थियो । उनको हत्या आरोपमा जिल्ला प्रहरी कार्यालय बाँकेले रोल्पा घर भएका २४ वर्षीय अनिल परियारलाई पक्राउ गरी सार्वजनिक गरेको हो । 

जिल्ला प्रहरी कार्यालय बाँकेका प्रमुख एसपी तुलबहादुर कार्कीका अनुसार अनिललाई प्रहरीले बाँकेको राप्तीसोनारी गाउँपालिका १ तीनघारी टोलस्थित भौवा नाका क्षेत्रबाट मंगलबार बिहान पक्राउ गरेको हो । उनि त्यहा बाट जंगलको बाटो हुदै भारततर्फ जाने तयारीमा रहेका थिए । स्थानियको घरमा शौचालयमा लुकेर वसेका अनिललाई पक्राउ गरिएको प्रहरीले जनाएको छ । 

असोज २७ गते बिहान झन्डै १ बजेतिर कोहलपुर (८ बंगलाचोकस्थित कच्ची सडकमा चन्द्रबहादुरको शरीर फेला परेको थियो । तर उनको टाउको भने फेला परेको थिएन । शव फेला परेपछि अनुसन्धानकै क्रममा सोमबार चन्द्रबहादुरको टाउको फेला परेको थियो ।

घटनास्थलबाट झन्डै ५ सय मिटर पर कोहलपुर (८ पिपिरीस्थित आरोपी अनिलकै बहिनीको घरको  सेप्टिक ट्यांकीमा टाउको फेला परेको थियो । उक्त ट्यांकीबाट घटनामा प्रयोग भएको हतियारसमेत फेला परेको थियो ।

मृतक र आरोपीबीच के कारणले विवाद भएको भन्ने खुलिसकेको छैन । उनीहरूबीच पुरानो चिनजान समेत नभएको खुलेको छ । पक्राउ परेका आरोपी अनिल वैशाखमा मात्रै जेलबाट रिहा भएका थिए । इलाका प्रहरी कार्यालय कोहलपुरबाट उनीमाथि बलात्कार मुद्दा चलेको थियो । दोषी ठहर भइ वैशाखमा मात्रै जेलबाट उनी रिहा भएका थिए ।