पार्टी कार्यालय बनाउने एमालेको पाँच बुँदे कार्ययोजना अलपत्र, गुरुङको दानप्रति तिब्र असन्तुष्टि

२९ असोज, काठमाडौं । नेकपा एमालेको पार्टी कार्यालय भाटभटेनीका सञ्चालक तथा व्यवसायी मीनबहादुर गुरुङले बनाइदिने भएपछि त्यसको व्यापक आलोचना भएको छ । पार्टीभित्र र बाहिर यसको आलोचना भएको हो । एमालेका पार्टी पंक्तिमा शीर निहुरिएको भन्दै अध्यक्ष केपी ओलीको सुषुप्त रुपमा विरोध भएको हो । खासगरी एमालेका इमानदार नेता कार्यकर्ता यसको विरोधमा रहेका छन् ।

काठमाडौंको कीर्तिपुरमा गुरुङले दान गरेको जग्गामा एमालेको पार्टी कार्यालय बनाउने भन्दै अध्यक्ष केपी शर्मा ओलीले शिलान्यास गरिसकेपछि एमालेभित्र एक प्रकारको तरंग नै पैदा भएको थियो । व्यवसायी गुरुङले आगामी वर्षको घटस्थापनाका दिन भवन तथा जग्गा हस्तान्तरण हुने गरी निर्माणको काम भइरहेको छ ।  एमाले स्थायी कमिटी सदस्य बिन्दा नेपालीले साढे पाँच लाख पार्टी सदस्यको स्वाभिमानी शीर झुकाउने र २८ लाख मतदाताको अपमान गर्ने कदम फिर्ता लिन माग गरेकी भएपनि एमाले अध्यक्ष ओलीले निर्णयबाट फिर्ता नहुने जनाइसकेका छन् । व्यापार व्यवसाय गर्नेले पारदर्शी रूपमा कम्पनीको सामाजिक दायित्वअन्तर्गत सामाजिक काममा सहयोग गर्नु कर्तव्य नै भए पनि राजनीतिक दलले कार्यालय बनाउन यस्तो सहयोग लिनु र व्यापारीले दिनु दुवै गलत भएको पाण्डेको टिप्पणी थियो ।

‘दिनेले किन र कसरी दिए उनैलाई थाहा होला । तर, स्वीकार गर्नेले पार्टीको निर्णायक तहमा छलफल र निर्णय त परको कुरा जानकारीसमेत नहुने गरी गरिएको यो निर्णय दिर्घकालमा आत्मघाती सावित हुनेछ’, उनले सामाजिक सञ्जालमा लेखेकी छन्, ‘समय घर्किसकेको छैन । मनमोहन र मदनहरूले उचो बनाएको पार्टीको इतिहास, वर्तमानमा बाँचेका स्वाभिमानी पार्टी पंक्ति र भावी सन्ततीका लागि एमालेको गौरव जोगाउने हो भने यो गÞलत निर्णय सच्याउनैपर्छ । समयमै सोचौँ ।’ यस्तै एमाले नेतृ उषाकिरण तिम्सिनाले पनि व्यावसायीबाट पार्टी कार्यालय दान लिने निर्णय फिर्ता लिन माग गरेकी छन् । ‘समय घर्किएको छैन । हामीलाई कुनै व्यापारीले बनाइदिएको ठूलो महलभन्दा मदननगरमा जति मिल्छ, त्यतिमै आफ्नै पसिनाले सिँचिएको भवन प्यारो र गर्विलो हुनेछ । म नेतृत्वसमक्ष निवेदन गर्न चाहन्छु यो निर्णय फिर्ता लिईयोस् । हामीलाई बाँचुञ्जेल एमाले भएर स्वाभिमानका साथ उभिने भूमि बाँकी राखिदिनुहोस’, केन्द्रीय सदस्य तिमल्सिनाले फेसबुकमा लेखेकी छन् ।

मानिसहरू दसैँ बिदामा भएका बेला २५ असोज महाअष्टमी÷महानवमीका दिन प्रधानमन्त्री एवं एमाले अध्यक्ष केपी शर्मा ओलीले कीर्तिपुर नगरपालिका–२ मैत्रीनगरमा एमाले केन्द्रीय कार्यालय भवनको शिलान्यास गरेका थिए । गुरुङले जग्गा दान गर्ने तथा भवन बनाउने विषयमा एमालेको कुनै पनि तहमा छलफलसमेत भएको थिएन । भाटभटेनीका सञ्चालक गुरुङबाट दान गरिएको १० रोपनी १४ आना जग्गामा अत्याधुनिक भवन बन्ने एमालेका महासचिव शंकर पोखरेलको भनाइ छ । शिलान्यासपछि उनले पत्रकारसँग भनेका थिए, ‘भवनको लागत र विस्तृत पक्ष तर्जुमाको क्रममा छ ।’ व्यापारी गुरुङबाट पार्टी कार्यालय दान लिने निर्णयको सामाजिक सञ्जालका प्रयोगकर्ताहरूले पनि आलोचना गरिरहेका छन् ।

यसअघि एमालेले पार्टी कार्यालय बनाउन पाँच कार्ययोजना अघि सारेको थियो । गत भदौ १८ र १९ गते बसेको पोलिटब्युरो बैठकमा पेस भएको र सचिवालयले अन्तिम रूप दिएको वार्षिक कार्ययोजनामा केन्द्रीय कार्यालय बनाउने कुरालाई प्राथमिकताका साथ राखिएको थियो । एमालेले आगामी मंसिरभित्र पार्टीको केन्द्रीय कार्यालय भवन बनाउनका लागि उपयुक्त जग्गाको पहिचान र व्यवस्थापन गरिसक्ने कार्य योजनामा उल्लेख गरेको थियो । त्यस्तै पार्टीको निर्णयबमोजिम पार्टीको केन्द्रीय कार्यालय भवन निर्माणका लागि स्रोत संकलन गर्ने कामलाई अभियानका रूपमा अघि बढाउने पनि योजनाका रूपमा अघि सारिएको थियो ।

सदस्यता नवीकरण र विस्तारका क्रममा प्रत्येक सदस्यबाट न्यूनतम १०० रूपैयाँ संकलन गर्ने कामलाई यथाशीघ्र कार्यान्वयन गर्न पनि एमालेले तहगत कमिटीलाई निर्देशन दिएको थियो । यस्तै, थप आर्थिक सहयोग गर्ने पार्टी कार्यकर्ता र सहयोग गर्न सक्ने अन्य सहयोगीहरूको रोस्टर तयार गरी पार्टी केन्द्रमा पठाउन भनिएको थियो । संगठन विभागका अनुसार एमालेको संगठित सदस्य साढे पाँच लाख हाराहारी छन् । उनीहरूबाट सय रूपैयाँ उठाएर एमालेले केन्द्रीय कार्यालय बनाउन लागेको भएपनि त्यसलाई छाडेर गुरुङले दान दिएको जग्गामा पार्टी कार्यालय बनाउने भएको हो ।

२०७२ सालको भूकम्पले बल्खुमा रहेको पार्टी मुख्यालय क्षतिग्रस्त तुल्याएपछि एमाले भाडाको घरमा बस्दै आएको छ । यसअघि एमाले धुम्बाराहीस्थित पासाङ ल्हामु स्मृति प्रतिष्ठानको भवनमा बसेको थियो । सरकारले प्रतिष्ठानलाई भोगाधिकार दिएको जग्गा एमालेलाई भाडामा लगाइएको भन्दै विरोध भएपछि त्यहाँबाट थापाथली हाइट सरेको थियो। थापाथलीमा एमाले व्यापारी सञ्जय अग्रवालको घरमा भाडामा बसेको थियो । अहिले पनि त्यहाँ एमालेको उद्योग विभाग छ ।

केन्द्रीय कार्यालय चाहिँ त्यहाँबाट सारेर २०७९ वैशाख ९ गते ललितपुर च्यासलस्थित तुलसीलाल स्मृति प्रतिष्ठानमा पु¥याइएको थियो । तुलसीलाल स्मृति प्रतिष्ठानको भवन एमालेले पाँच वर्षका लागि भाडामा लिएको हो। यद्यपि यो पनि सरकारले प्रतिष्ठानलाई भोगाधिकार दिएको हो । प्रतिष्ठानले एमालेलाई भोगचलन दिएको भन्दै त्यहाँ पनि आलोचना भएको थियो । भूकम्पले भत्काएको बल्खुको भवन एमालेले २०५१ सालमा बनाएको हो । त्यतिबेला एमालेको अल्पमतको सरकार थियो । पार्टीका अध्यक्ष मनमोहन अधिकारी अध्यक्ष र माधव कुमार नेपाल महासचिव थिए ।