उद्योगीलाई प्राधिकरणको चेतावनी, कात्तिक ८ गतेभित्र बक्यौता नतिरे लाइन काटिन्छ

३० असोज, काठमाडौं । नेपाल विद्युत् प्राधिकरणले डेडिकेटेड फिडर र ट्रंकलाइनको प्रिमियम महसुल बक्यौता कात्तिक ८ गतेभित्र बुझाउन ताकेता गरेको छ । ४९ उद्योगलाई प्राधिकरणले पत्र पठाएर बक्यौता नतिरे विद्युत् लाइन काट्ने चेतावनी दिएको छ ।

२४ असोजमा सार्वजनिक सूचना जारी गर्दै प्राधिकरणले बक्यौता तिर्न उद्योगहरूलाई ताकेता गरेको छ । ८ अर्ब ४ करोड ९ लाख हाराहारीमा रहेको कुल बक्यौता रहेको प्राधिकरणले जनाएको छ । सार्वजनिक सूचना र सीधै पत्र पठाउँदासमेत हालसम्म कुनै पनि उद्योग सम्पर्कमा नआएको प्राधिकरणले जनाएको छ । दसैँ बिदा सकिएपछि मंगलबारदेखि नै कार्यालयहरु खुलेका छन् । अब यो विषयमा प्राधिकरणले थप छलफल पनि अघि बढाउने बताएको छ । 

बक्यौता नतिरेको भन्दै प्राधिकरणले गत असार २५, २६ र २७ गते ६ उद्योगको लाइन काटेको थियो । कानुनअनुसार बक्यौता नतिरेसम्म काटिएको लाइन जोड्न मिल्दैन । प्राधिकरणले ८ साउनको निर्णय तत्काल पत्रमार्फत उद्योगहरूलाई दिएको थियो । त्यसपछि २५ भदौ, २२ असोजमा पनि पत्रमार्फत ताकेता गरिएको थियो । साथै, २४ असोजमा सार्वजनिक सूचना पनि प्रकाशन गरिएको हो ।