सर्वोच्च अदालतको भवन निर्माणसँग जोडिएर प्रस्तावित न्यायाधीश निरौलाविरुद्ध परे दुई उजुरी

३० असोज, काठमाडौं । सर्वोच्च अदालतको न्यायाधीशमा प्रस्तावित नृपध्वज निरौलाविरुद्ध दुईवटा उजुरी परेको छ । सर्वोच्च अदालतको भवन निर्माणमा उनले गरेको गल्तीलाई उजुरीमा समेटिएको छ । संसदीय सुनुवाइ समितिकी सहसचिव निर्मलादेवी लामिछाने वस्तीले उनीविरुद्ध निर्धारित समयमा दुईवटा उजुरी परेको जानकारी दिइन् । 

प्रस्तावित न्यायाधीश निरौलाविरुद्ध एकजनाले आफैँ उपस्थित भएर उजुरी दिएका छन् भने अर्को उजुरी इमेलमार्फत आएको हो ।  निरौलाविरुद्ध सर्वोच्च अदालतको भवन निर्माणसँग सम्बन्धित उजुरीले उनलाई समस्यामा पाने सम्भावना छ । अर्को उजुरी भने नियुक्ति प्रक्रियासँग सम्बन्धित छ ।

न्यायाधिश नियुक्ति प्रक्रियालाई लिएर नेपाल बार एशोसियसनले विरोध गरेको थियो । संविधान र कानुन अनुसार नियुक्ति नभएको भनेर बारले विरोध जनाएको थियो । त्यसैसँग सम्बन्धित रहेर उजुरी परेको हो बताइएको छ । उनीसँगै सर्वोच्चको न्यायाधीश सिफारिस भएका नित्यानन्द पाण्डेविरुद्ध भने उजुरी नपरेको बताइएको छ । 

संसदीय सुनुवाइ समितिको यही असोज १५ गतेको बैठकको निर्णयबाट सर्वोच्च अदालतका लागि प्रस्तावित न्यायाधीशद्धय निरौला र पाण्डेविरुद्ध उजुरी आह्वान गरेको थियो ।