चिन्तामा प्रधानमन्त्री ओली, तीन महिना नपुग्दै कसले चलायो दुई तिहाइको सरकार ढल्ने हल्ला ?

१ कात्तिक, काठमाडौं । यतिबेला बजारका एमालेका अध्यक्ष केपी शर्मा ओलीले नेतृत्व गरिरहेको सरकार ढल्ने हल्ला व्याप्त छ । बजारका चोक र चिया पसलमा ओली सरकार ढल्ने र एकीकृत समाजवादीका अध्यक्ष माधवकुमार नेपाल वा नेपाली कांग्रेसका वरिष्ठ नेता डा शेखर कोइराला प्रधानमन्त्री बन्ने कुराले निकै स्थान पाएको छ । जुन कुरा प्रधानमन्त्री ओलीले पनि बुधबार एक कार्यक्रममा खोले ।

ओलीले किन राजीनामा दिने र माधव नेपाल वा शेखर कोइराला कसरी प्रधानमन्त्री बन्छन् भन्न प्रक्रियाका विषयमा भने चिया चोकमा सरकार ढल्छ भनेर गफ दिनेहरू अनभिज्ञ छन् । तर, सरकार ढल्छ, तिहारसम्म पनि जाँदैन भन्न छोड्दैनन् । जुन हल्ला बजार व्याप्त रुपमा फैलिरहेको छ । कसले कुन नियतले यी कुराहरू प्रचार गर्न लगाइरहेका छ भन्ने कुराको खोजी स्वयंम प्रधानमन्त्रीले पनि गरिरहेका छन् ।    
 
बुधबार प्रधानमन्त्री ओली सरकार ढल्ने भन्दै गलत हल्ला फैलाएको बताए । करिब दुई तिहाइको जनमत प्राप्त सरकारलाई कसले ढाल्ने योजना बनायो भन्ने बारेमा उनले स्पष्टसँग केही बताउन भने सकेका छैनन् । भरखरै नयाँ सरकार निर्माण भएको तीन महिना पूरा भएको छ । गत असार ३० गते राष्ट्रपति रामचन्द्र पौडेलले नेपाली काँग्रेस र नेकपा एमालेको सिफारिसमा ओलीलाई प्रधानमन्त्रीमा नियुक्त गरेका थिए । योसँगै करिब एक दशकपछि देशको पहिलो र दोस्रो दलको गठबन्धनमा सरकार बनेको थियो । 

यो सरकार गठन हुँदा जनतामा जुन आशा र अपेक्षा थियो । तीन महिनामै त्यो घटेको छ भने अहिलेको परिस्थिति पनि फरक ढंगले विकसित भइरहेको छ । अहिलेको लडाइँ राजनीतिक नभएर जनताको जीवनस्तर सुधार, आर्थिक समृद्धि र स्थायित्व कायम गर्नुसँग थियो । तर, तीन महिनाले राम्रो संकेत दिएन र जनतामा पनि काम गर्न नसक्ने सरकार अब धेरै जाँदैन भन्न थालेका छन् । 

प्रधानमन्त्री आफैले पछिल्ला दिनहरू सरकार ढल्न लागेको भन्दै हिँड्न थालेका छन् । पहिलो पटक केही दिन पहिले झापामा आयोजित एक कार्यक्रममा उनले सरकार ढाल्ने षड्यन्त्र भएको सार्वजनिक कार्यक्रममा उदघोष गरेका थिए । बुधबारको कार्यक्रममा समेत स्पष्ट रुपमा नै बुझिने गरी सरकार ढाल्ने खेलोमेलो भएको गुनासो गरे । सरसर्ती हेर्दा वर्तमान सरकारले मुख्यतया दुईवटा काम गर्न सक्थ्यो । पहिलो, भ्रष्टाचार उन्मुलन गर्ने दिशामा ठोस् रूपमा अगाडि बढ्न सक्थ्यो । तर, त्यो काममा सरकार चुकेको छ । सहकारी ठगी प्रकरणको विषयको छानबिनदेखि अन्य काण्डहरूमा समेत सरकारले निचोडमा पुग्नेगरी केही काम गर्न सकेको छैन । 
 
जनताको निराशालाई आशामा बदल्ने प्रयत्न कांग्रेस–एमाले सरकारबाट भएको देखिएन । सर्भिस डेलिभरीको सन्दर्भ सरकारले योबिचमा धेरै काम गर्न सक्थ्यो । तर, त्यसमा पनि सरकार असफल देखियो । सरकारले डिजिटलाइज्ड गर्ने भनेको छ, राष्ट्रिय परिचयपत्र बनाएको छ, तर त्यसको प्रभावकारिता जनताले महसुस गर्नसक्ने देखिएको छैन । यस्ता काममा सरकारले तत्कालै डेलिभरी दिन सक्थ्यो, त्यो भएको छैन । जसबाट जनता निरास बनिरहेका छन र सरकारविरुद्ध हल्ला फैलाउन विपक्षीहरुलाई पनि सजिलो भएको छ । 

हालको महत्वपूर्ण कुरा भनेको विपद् व्यवस्थापन थियो । देशभर बाढी पहिरो गएर तहसनहसको अवस्था हुँदा राज्यको मूल नेतृत्वमा रहेका व्यक्तिकै उपस्थिति देखिन नसक्नुले पनि सरकारको औचित्यलाई पुष्टि गर्न सकस परिरहेको छ । अहिले दिनैपिच्छे सरकार परिवर्तन हुन्छ भन्नेकुरा पनि सुनिन्छ, दसैंपछि तुरुन्त परिवर्तन हुन्छ रे ! कुन दसैंपछि ? २०८४ सालको दसैंपछिको चुनावमा ? प्रधानमन्त्री ओलीले एमाले र कांग्रेस गठबन्धनको सरकार परिवर्तनको कुरामा कुनै सत्यता नरहेको स्पष्ट पारेका छन् । तर, जनतालाई विस्वास छैन् । दसैंपछि सरकार परिवर्तन हुन्छ भन्ने कुरा चलेको छ जनता त्यही पत्याई रहेका छन् ।  

६९ औं प्रहरी दिवसको अवसरमा बुधबार आयोजित कार्यक्रममा प्रधानमन्त्री ओलीले सरकार परिवर्तनको भ्रम नछर्न र त्यस्ता भ्रममा नपर्न आग्रह गरेका हुन् । एमाले र कांग्रेस गठबन्धनको सरकार लगभग दुई तिहाइको रहेको र त्यो बलियो छ भन्ने हेक्का राख्न पनि उनले आग्रह गरेका थिए । नेपालको राजनीति, नेपालको समाज, नेपालो अर्थतन्त्र, नेपालको विकासमा सबैभन्दा ठूलो योगदान गरेका नेपाली कांग्रेस र एमालेजस्तो पार्टीहरू मिलेर अहिले सरकार बनाएका छन् । सरकार लगभग दुई तिहाइको छ भन्ने कुरा सबैमा हेक्का रहोस् । यो खरानीको डल्लो होइन,’ ओलीले भने, ’एमाले र कांग्रेस जसको इतिहास, यो देशको विकास गर्ने कुरामा छ, परिवर्तन गर्ने कुरामा छ । त्यस्ता पार्टीहरूको सरकार हो यो ।’

एमाले र कांग्रेसका नेताहरु भन्छन, यो सरकार भनेको कांग्रेस र एमालेको संयुक्त सरकार हो । सरकार ढाल्न कांग्रेस वा एमालेमध्ये कसैले चाहनुपर्छ । अहिलेको सरकार असफल बनाउने काम यी दुबै पार्टीका नेताले गर्दैनन् । उनीहरुको भनाइमा विपक्षीहरुले केही विषय नपाएर यो सरकार अब धेरै दिन जाँदैन भनेका हुन् । कति पयलाई कांग्रेस सभापति शेरबहादुर देउवा रिसाए सरकार ढल्ने थियो भन्ने पनि लागेको छ । तर, देउवाले आफैले बनाएको सरकारलाई कुरा आउँदैन । कित प्रधानमन्त्री ओलीले अब म प्रधानमन्त्री बन्दिन र छोड्छु भन्नुपर्यो । त्यो अवस्था पनि अहिले छैन् । त्यसैले सरकार ढल्छ भन्ने कुरा विपक्षीहरुको अफवाह मात्र हो ।