इन्सपेक्टर शाही पक्राउ प्रकरणमा किन जोडिदैछन् एसपी थापा ?

१ कात्तिक, काठमाडौं । हनि ट्रयापिङमा संलग्न गिरोहसँग मिलेर पैसा असुल्ने इन्सपेक्टर बिनुकुमारी शाहीलाई फरार बनाइएको हो कि फरार भएकी हुन भन्ने एकिन भएको छैन । इन्सपेक्टर शाहीलाई जोगाउन एसपी कमल थापा लागिपरेपछि उनलाई फरार बनाइएको हो वा आफै फरार भएकी हुन भन्ने एकिन नभएको हो ।

सो घटनासँग एसपी कमल थापा जोडिएपछि प्रहरी प्रधान कार्यालयले छानबिन गर्न अर्को समिति बनाएपनि बाहिर सार्वजनिक गरेको छैन । इन्सपेक्टर शाहीमाथि अहिले संगठित अपराध सम्बन्धी कसुर पनि आकर्षित हुने भएपछि फरार भएको बताइएको छ । ललितपुर प्रहरीले इन्सपेक्टर शाहीलाई पक्राउको तयारी गरेको छ । पक्राउ पूर्जी समेत लिइसकेको छ । संगठित शैलीमा अपराध गरेर व्यापारीलाई थुनामा राखी पैसा असुल गरिएको अनुसन्धानमा देखिएपछि आपराधिक लाभसँगै संगठित अपराध मुद्दा पनि चलाउने विषयमा प्रहरीले सरकारी वकिल कार्यालयमा छलफल गरेको थियो ।

जिल्ला प्रहरी परिसर, ललितपुरले हाल सहायक हवलदार महेन्द्र हमालसँग चार जनालाई थुनामा राखी अनुसन्धान गरिरहेको छ । इटहरीका ताज इस्लाम नेतृत्वको समूहले इन्सपेक्टर शाहीसँग मिलेर एक व्यापारीलाई बलात्कार मुद्दामा फसाइदिने भन्दै एक दिन थुनामा राखेर ३० लाख रुपैयाँ असुल गरी छाडेको थियो । सो गिरोह पेसेवर देखिएको, घटना योजनाबद्ध भएको र तीन जना भन्दा धेरै व्यक्तिको संलग्नता देखिएपछि ललितपुर प्रहरीले संगठित अपराध कसुरमा पनि अनुसन्धान गर्न लागेको हो । 

संगठित अपराधमा प्रहरीले आरोपीलाई ६० दिनसम्म थुनामा राखेर अनुसन्धान गर्न पाउँछ भने सजाय पनि ५० प्रतिशत थप हुन्छ । आपराधिक लाभ मात्र मुद्दा दायर भएमा २४ दिनमै मुद्दा दर्ता गरिसक्नुपर्ने हुन्छ । प्रहरीले इन्सपेक्टर शाहीलाई भने पक्राउ गर्न चासो दिएको छैन । स्रोतका अनुसार प्रहरीको माथिल्लो निकायबाटै उनलाई तत्काल पक्राउ नगर्न भनेर दबाब दिइएको छ । फरार अवस्थामै उनले चलखेल गरिरहेकी छिन् । यसअघि छानबिन र निलम्बन रोक्न समेत अनेक प्रयास गरेकी थिइन् । तर, पक्राउ परेका अभियुक्तहरू ताज इस्लाम र सुष्मा विकले नै उनको सबै पोल खोलिदिएका छन् । इन्सपेक्टरसँगको सल्लाहमै त्यसरी झगडाको उजुरी दिन लगाएर थुनामा राखी पैसा असुलिएको उनीहरुको बयान छ । प्रहरी प्रभाग भैंसेपाटीको प्रमुख हुँदा शाहीले यस्तो धन्दा चलाएकी थिइन् ।

इन्सपेक्टर शाहीले गिरोहका नाइके इस्लामको मोबाइल समेत प्रहरी कार्यालयबाट गायब बनाएकी छिन् । सो मोबाइलमा इन्सपेक्टर शाहीदेखि माथिल्लो तहका प्रहरीसँगको उनको कुराकानीहरू थिए । त्यो कुरा लुकाउन उनले मोबाइल गायब बनाइएकी हुन् । हाल अख्तियारमा कार्यरत रहेका एसपी थापा  घटनाको दिन मुख्य आरोपी ताजसँग बसेका थिए । एसपी थापा र ताजबिच एयरपोर्टको एक रेस्टुरेन्टमा भेट भएको थियो । साथै ताज र इन्स्पेक्टर शाहीबिच समेत उनले नै चिनजान गराइदिएर ती व्यापारीलाई थुन्न लगाएको छानबिनमा खुलेको छ । ताजको मोबाइल नै गायब बनाइएकाले एसपीसँगको उनको सम्बन्धबारे विस्तृत खुल्न सकेको छैन । 

एसपी थापा सुनसरीको प्रहरी प्रमुखका रूपमा हुँदा ताजसँग नजिकिएका थिए । सोही समूहको हनी ट्र्यापिङको अर्काे घटनामा पनि छानबिन भइरहेको छ । गत जेठमा ताज निकट एक युवतीले ठेकेदार विदुर शर्माविरुद्ध समेत दरबारमार्ग वृत्तमा जाहेरी दिएकी थिइन । पछि १६ लाख लेनदेन गरी जाहेरी फिर्ता गराउन लागिएको खुलेको छ । दोलखाका गणेश उप्रेतीको योजनामा त्यसरी शर्मालाई हनी ट्र्यापिङमा फसाइएको पुष्टि भइसकेको छ ।