सहकारीको रकम अपचलन प्रकरणमा रास्वपाका सभापति लामिछाने चाँडै पक्राउ पर्ने, प्रचण्डसँग हारगुहार

२ कात्तिक, काठमाडौं । सरकारले सहकारीको रकम अपचलन गरेको विषयमा राष्ट्रिय स्वतन्त्र पार्टी (रास्वपा) का सभापति रवि लामिछानेलाई एक दुइदिनभित्रै पक्राउ गर्ने भएको छ । बिहीबार बसेको तीन दलको बैठकमा उनलाई तत्काले पक्राउ गरी अनुसन्धानमा पठाउनेबारे छलफल भएको थियो । 

रविलाई सहकारी प्रकरणमा एक दुइदिनभित्रै पक्राउ गर्ने प्रधानमन्त्री केपी शर्मा ओलीले जानकारी दिएको नेकपा माओवादीका अध्यक्ष पुष्पकमल दाहाल प्रचण्डले बताएका छन् । उनले प्रतिपक्ष दलको बैठकमा यस्तो जानकारी गराएका हुन् । नयाँ बानेश्वरस्थित संसद् भवनमा शुक्रबार बिहान बसेको विपक्षी दलहरुको बैठकमा रास्वपा सभापति लामिछानेले पनि आफूलाई समाउन लागिएको र पक्राउविरुद्ध सबै उभिनु पर्ने बताएका थिए ।

उनले सरकारले फसाउने नियत लियो भन्दै मलाई मात्र होइन, भोलि जोसुकैलाई पक्राउ गर्न सक्छ  आफूलाई जस्तै समस्या भोलि जोसुकैलाई आइपर्ने उनको तर्क गरेका थिए । ‘मलाई पक्राउ गर्न सक्छ भन्ने संकेत मैले पनि पाएको छु । यसमा सबैले साथ दिनुपर्यो भन्ने रविको निवेदन थियो’, बैठकमा सहभागी एक नेताले भने ।

नेकपा माओवादी केन्द्रका अध्यक्ष पुष्पकमल दाहाल प्रचण्डले पनि सभापति लामिछानेलाई पक्राउ गर्ने तयारी रहेको ब्रिफिङ गरेका थिए । बिहीबार मात्र प्रधानमन्त्री एवं नेकपा एमालेका अध्यक्ष केपी शर्मा ओली र नेपाली कांग्रेसका सभापति शेरबहादुर देउवासँग प्रचण्डले भेटवार्ता गरेका थिए ।

उक्त भेटवार्ताका आधारमा प्रचण्डले रवि लामिछाने पक्राउ पर्न सक्ने बताएका थिए । प्रचण्डको ब्रिफिङमा सहमत लामिछानेले पक्राउ परिने संभावनाबारे जानकारी रहेको बताउँदै विपक्षीहरुको साथ मागेका थिए । बैठकमा सहभागी ती नेताका अनुसार बैठकले रवि लामिछानेको विषयमा एक भएर साथ दिने निष्कर्ष  निकालेको छ । बैठकमा प्रचण्ड र रवि लामिछानेले पक्रउा पर्ने कुरा राखे पनि अरु नेताहरुले केही प्रतिक्रिया दिएका थिएनन् ।