पोखरामा प्रशासनको हाइअलर्ट, सहकारी पीडित र रास्वपा कार्यकर्ता सडकमा

३ कात्तिक, पोखरा । पोखरा र आसपासका क्षेत्रमा राष्ट्रिय स्वतन्त्र पार्टीका कार्यकता र सहकारी पीडित सडकमा आएपछि सुरक्षा व्यवस्था कडा बनाइएको छ । सो पार्टीका सभापति रवि लामिछाने पक्राउ परेसँगै पोखरामा रास्वपा कार्यकर्ता र सहकारी पीडितहरू आमनेसामने भएका छन् । 

रास्वपा कार्यकर्ताले लामिछानेको पक्राउ विरुद्ध प्रदर्शनको तयारी थाल्दै गर्दा सहकारी पीडितहरूले पनि सडकमा नाराबाजी सुरु गरेका छन् । लामिछानेको समर्थनमा रास्वपाले मानवअधिकार चोकमा बिहान ११ बजे प्रदर्शनको कार्यक्रम राखेको छ । सहकारी पीडितहरूले पनि गैह्रापाटनमा शान्तिपूर्ण प्रदर्शनमा छन् ।
 
सहकारी पीडितहरूले सामाजिक सञ्जालमा गैह्रापाटनमा उपस्थित हुने सूचना पोस्ट गरिरहेका छन् । गैह्रापाटन जिल्ला प्रहरी कार्यालय भएको ठाउँ हो । जिल्ला प्रशासन कार्यालयले भने दुवै पक्षलाई प्रदर्शन नगर्न आग्रह गर्दै आएको छ । दुवै पक्षले प्रदर्शनको तयारी थालेपछि सम्भावित जोखिमलाई मध्यनजर गर्दै पोखराको सुरक्षा व्यवस्था कडा पारिएको छ ।

सहकारी ठगी र संगठित अपराधमा अनुसन्धानका लागि पक्राउ गरिएका पूर्व गृहमन्त्री एवं राष्ट्रिय स्वतन्त्र पार्टीका सभापतिलाई जिल्ला प्रहरी कार्यालय कास्कीमा राखिएको छ । प्रहरीको केन्द्रीय अनुसन्धान ब्युरो (सीआईबी) को टोलीले शुक्रबार साँझ काठमाडौंमा पक्राउ गरी राती नै स्थलमार्गबाट पोखरा ल्याएको हो ।