शान्ति सुरक्षा कायम राख्न गरिएको आग्रहलाई अटेर गरे बल प्रयोग गर्ने कास्की प्रशासनको चेतावनी

३ कात्तिक, पोखरा । पोखरा र आसपासका क्षेत्रमा नारा जुलुस नगर्न आग्रह गर्दै कास्की जिल्ला प्रशासन कार्यालयले आग्रह नमाने बल प्रयोग गर्ने चेतावनी दिएको छ । विहान बसेको जिल्ला सुरक्षा समन्वय समितिको बैठकपछि प्रशासनले नारा जुलुस नगर्न आग्रह गरेको हो । पोखरा क्षेत्रलाई शान्तिपूर्ण बनाउने विषयमा प्रशासन र राजनीतिक दल तथा सहकारी पीडितका प्रतिनिधिसँग पनि छलफल भएको छ । 

सर्वपक्षीय बैठकमा सबैले शान्ति कायम राख्न सहयोग गर्ने विषयमा सहमति भएको र राष्ट्रिय स्वतन्त्र पार्टी (रास्वपा) र सहकारी पीडितका प्रतिनिधिलाई नारा जुलुस नगर्न आग्रह गरिएको कास्की जिल्ला प्रशासन कार्यलयका सहायक प्रमुख जिल्ला अधिकारी शिव लम्सालले नेपाल बहसलाई जानकारी दिए । उनले विहान रास्वपाका कार्यकता र सहकारी पीडित प्रदर्शनका लागि सडकमा आएको र प्रशासनले छलफल गरी नारा जुलुस नगर्न आग्रह गरेपछि सहकारी पीडितहरु फर्किएको बताए । उनले बलजफ्ती गरे प्रशासन बल प्रयोग गर्न बाध्य हुने बताए ।  

रवि लामिछानेलाई सहकारी ठगीको आरोप पक्राउ गरी पोखरा पुर्याएपछि शनिबार विहानै देखि रास्वपाका कार्यकता सडकमा आएका थिए । उनीहरु सडकमा प्रर्दशनका लागि निस्किएको भन्दै सहकारी पीडितहरु पनि सडकमा आएका थिए । रास्वपाका कार्यकता र सहकारी पीडित सडकमा आएपछि सुरक्षा व्यवस्था कडा बनाइएको छ । सो पार्टीका सभापति लामिछाने पक्राउ परेसँगै पोखरामा रास्वपा कार्यकर्ता र सहकारी पीडितहरू आमनेसामने भएका थिए ।  

रास्वपा कार्यकर्ता अहिले पनि सडकमा रहेपनि सहकारी पीडितहरुले भने आज प्रदर्शन नगर्ने भएका छन् । सहकारी पीडित संघका अध्यक्ष किरण श्रेष्ठले पोखरालाई शान्तिपूर्ण राख्न प्रशासनले आग्रह गरेपछि आफूहरुले प्रदर्शन रोकेको बताए । नेपालबहससँग कुरागर्दै श्रेष्ठले विभिन्न जिल्लाबाट रास्वपाले पोखरामा मान्छे उतार्ने भनेपछि आफूहरुले पनि रविमाथि कारवाहीको माग गर्दै प्रदर्शनको तयारी गरेको बताए । उनले रास्वपाले पनि रवि लामिछानेमाथि निस्पक्ष अनुसन्धान गर्न सहयोग गर्नुपर्ने बताए । 

श्रेष्ठले पर्दशन नगर्ने बताएपनि ठूलो संख्यामा सहकारी पीडितहरु सडकमा देखिएका छन् । यस्तै प्रशासनसँग सहमतिपछि पनि रास्वपाका कार्यकर्ता जिरो किलोमिटरमा भेला भएर रास्वपा कार्यकर्ता चिप्लेढुङ्गा मानवअधिकार चोकमा कोण सभा गर्ने तयारी गरेका छन् । सभापतिमाथि प्रतिशोध साँध्न पक्राउ गरिएको हो, यसैका विरुद्ध विरोध सभा आयोजना गरेका हुन् ।