पार्टीले भातृ संस्थाहरूलाई महत्व नदिएकोप्रति डा. शेखर कोइराला असन्तुष्ट

३ कात्तिक, मोरङ । नेपाली कांग्रेसका वरिष्ठ नेता डा. शेखर कोइरालाले पार्टीले भातृ संस्थाहरूलाई अझै पनि महत्व दिन नसकेको स्वीकार गर्दै यसले पार्टीका गतिविधिहरूमा समेत असर पर्ने भन्दै असन्तुष्टि जनाएका छन् । नेता कोइरालालाई भेट्न विराटनगर स्थित कोइराला निवास पुगेका नेपाल किसान महासंघका पदाधिकारीहरूको भेटमा नेता कोइरालाले पार्टीको मेरुदण्डका रूपमा रहेका भातृ संस्थाहरू निष्क्रिय बन्दा पार्टीलाई नै घाटा पुगिरहेको प्रति चिन्ता व्यक्त गरेका थिए ।

नेपाल किसान महासंघका केन्द्रीय सदस्य सीताराम भट्टराईको नेतृत्वमा कोइराला निवास विराटनगर पुगेको टोलीमा नेपाल किसान महासंघ कोशी प्रदेशका अध्यक्ष राजेन्द्र भट्टराई र कोशी प्रदेश सचिव यज्ञप्रसाद भट्टराईसहित नेपाली कांग्रेसका महासमिति सदस्य रोहित कुमार शाह सहित झापा कांग्रेसका नेताहरूको उपस्थिति रहेको महासंघले जनाएको छ ।

कांग्रेस नेता कोइरालासँगको भेटमा नेपाल किसान महासंघका कोशी प्रदेश अध्यक्ष राजेन्द्र भट्टराईले कोशी प्रदेशमा महासंघले हालसम्म गरेका कामहरूको बारेमा जानकारी गराएका थिए भने महासंघका कोशी प्रदेश सचिव यज्ञप्रसाद भट्टराईले महासंघको आसन्न महाधिवेशनमा पार्टीले गर्नुपर्ने सहयोगको विषयमा कुरा गरेका थिए । महासंघका कोशी प्रदेश सचिव यज्ञप्रसाद भट्टराईले किसानले वर्षेनी ब्यहोर्नु परेको प्राकृतिक प्रकोपबाट हुने गरेको क्षतिबाट किसानलाई बचाउन कृषि वीमालाई अनिवार्य गराउन सरकारलाई दवाव दिनुपर्ने माग समेत राखेका थिए । 

नेपाल किसान महासंघका केन्द्रीय सदस्य सीताराम भट्टराईले नेपाली कांग्रेसको सबैभन्दा ठूलो र पुरानो भातृसंगठनका रुपमा कृयाशिल नेपाल किसान महासंघलाई सशक्त र प्रभावशाली बनाउन सके ग्रामीण क्षेत्रसम्म कांग्रेसको संगठन बलियो हुने भएकोले पार्टीका नेताहरूले नेपाल किसान महासंघका कार्यक्रममा उपस्थित भएर किसान महासंघको हौसला बढाउनु पर्ने धारणा राखेका थिए । 

प्रतिउत्तरमा कांग्रेस वरिष्ठ नेता डा शेखर कोइरालाले आफू नेपाल किसान महासंघप्रति सधैं सकारात्मक र आशावादी समेत रहेको भन्दै किसान महासंघले आयोजना गर्ने कार्यक्रममा उपस्थित हुने प्रतिबद्धता व्यक्त गरेका थिए ।