सरकारले भन्यो-रवि लामिछानेबाट सुरुवात भयो, समितिले सिफारिस गरेका सबैलाई पक्राउ गरिन्छ

४ कात्तिक, काठमाडौं । सरकारले संसदीय समितिको सिफारिस अनुसार सहकारीको रकम अपचलन गर्ने सबैलाई पक्राउ गर्ने जानकारी दिएको छ । राष्ट्रिय स्वतन्त्र पार्टी (रास्वपा)का सभापति रवि लामिछाने पक्राउ पर्नु सहकारी छानबिन प्रतिवेदनको सुरुवात मात्र भएको सरकारको प्रतिक्रिया छ ।

सरकारका प्रवक्ता एवं सञ्चार तथा सूचना प्रविधिमन्त्री पृथ्वी सुब्बा गुरुङले मन्त्रिपरिषद्का निर्णय सार्वजनिक गर्ने क्रममा समितिले कारवाहीका लागि सिफारिस गरेका सबै रवि जसरी नै पक्राउ पर्ने बताए । संंसदले गठन गरेको सर्वाधिकारसम्पन्न सर्वदलीय समितिले जुन प्रतिवेदन दिएको थियो, उनले भने, ‘त्यसलाई मन्त्रिपरिषद्ले स्वामित्व ग्रहण गरी कार्यान्वयनको अभियानमा लगेको छ । त्यस प्रतिवेदनले औँल्याएको व्यक्तिलाई अनुसन्धानका लागि नियन्त्रणमा लिने क्रमको यो त सुरुवात भएको मात्र हो ।’ 

गुरुङले सहकारी संस्था बचत रकम दुरुपयोग सम्बन्धमा संसदीय छानबिन विशेष समितिको प्रतिवेदनअनुसार सरकारले कारबाही अघि बढाएको बताए । सो प्रतिवेदनउपर सरकारले आवश्यक थप अनुसन्धानसँगै कारबाही अघि बढाएको बताए । पछिल्लो पटक रवि लामिछाने पक्राउ परेपछि उनका समर्थकहरूले सरकारले लामिछानेलाई प्रतिसोधका आधारमा पक्राउ गरेको आरोप लगाइरहेका बेला मन्त्री गुरुङले सरकारले सर्वदलीय संसदीय समितिको प्रतिवेदनले कारबाही गर भनेका व्यक्तिहरुलाई पक्राउ गरेर कारबाही थालिएको दाबी गरे ।

उनले सरकारका सय दिनका कामबारे सूचनाहरू संकलन भइरहेको र आफूले पनि सञ्चार मन्त्रालयको नेतृत्वमा रहेर प्रभावकारी कामहरू गरेको बताए । प्रतिवेदनमा औँल्याइएका अन्य व्यक्तिका हकमा पनि अब क्रमशः कारबाही अघि बढ्ने उनले जानकारी दिए । लामिछानेलाई शुक्रबार पक्राउ गरी कास्की प्रहरी कार्यालयको हिरासतमा राखिएको छ । उनी सूर्यदर्शन सहकारीको रकम ठगी प्रकरणमा पक्राउ परेका हुन्। उनीविरुद्ध सहकारी ठगी, संगठित अपराध र सम्पत्ति शुद्धीकरण गरी तीनवटा मुद्दा चलाउने गरी प्रहरीले अनुसन्धान गरिरहेको छ ।