दलसम्बन्धी अध्यादेशमा सहमति जुटाउन नसकेपछि मन्त्रिपरिषद् बैठक स्थगित, देउवाले देखाए शेखर

५ कात्तिक, काठमाडौं । अन्तिम समयमा आएर नेपाली कांग्रेसका सभापति शेरबहादुर देउवाले प्रधानमन्त्री केपी शर्मा ओलीलाई राजनीतिक दल विभाजनसम्बन्धी अध्यादेश रोक्न भनेपछि आज साँझ बोलाइएको मन्त्रिपरिषदको बैठक स्थगित भएको छ । कांग्रेसका एक मन्त्रीले बैठक स्थगित भएको नेपालबहसलाई जानकारी दिए । अध्यादेशका विषयमा सहमति नभएपछि बैठक स्थगित भएको हो । 
 
अध्यादेशबारे देउवाले कांग्रेसभित्र सामान्य मात्रै छलफल गरेका थिए । इतरसमूहका नेता डा. शेखर कोइरालासँग एक चरणमा भएको छलफलमा उनले अध्यादेश ल्याउन नहुने सल्लाह दिएका थिए । त्यसपछि कोइराला विराटनगर लागे । ओलीले पनि अध्यादेशका विषयमा कोइरालासँग छलफल गर्न पाएका थिएनन् । देउवाले सहमति दिए आजको मन्त्रिपरिषदको बैठकबाट राष्ट्रपति समक्ष अध्यादेश प्रमाणीकरणका लागि सिफारिस गर्ने तयारीमा प्रधानमन्त्री थिए ।   

प्रधानमन्त्री ओली राजनीतिक दलसम्बन्धी ऐन २०७३ परिमार्जन गर्ने पक्षमा छन् । यसले केन्द्रीय सदस्य र संघीय संसदका कम्तीमा ४० प्रतिशत सदस्य भएमा दल विभाजन गर्न सक्ने थियो भने अब २० प्रतिशत बनाउने उनको योजना थियो । दल विभाजन गर्न सजिलो हुने गरी केन्द्रीय सदस्य वा संघीय संसदका सदस्यमध्ये २० प्रतिशत सदस्य भए पनि नयाँ दल गठन गर्न सक्ने गरी अध्यादेश तयार बनाइएको थियो । 

देउावले सहमति नदिँदा ओलीले जारी गर्न खोजेको दल विभाजन सम्बन्धी अध्यादेशको भविष्य फेरि अन्योलमा परेको छ । देउवाको पूर्ण सहमति प्राप्त हुन नसकेपछि सो अध्यादेश अन्योलमा परेको हो । अहिलेलाई सभापति देउवाले शेखरलाई देखाएर अध्यादेश जारी नगर्न भनेपछि मन्त्रिपरिषद बैठक स्थगित भयो, ति मन्त्रिीले भने । आजको बैठकमा राजनीतिक दलसम्बन्धी अध्यादेशबारे छलफल हुनसक्ने बताइएको थियो । सरकारले दलहरू फुटाउन सहज हुनेगरी अध्यादेश ल्याउने तयारी अघि बढाएपनि शीर्ष नेताहरूले भने जानकारी दिएका छैनन् ।