सभामुखसँग सभापतिको गुनासोः चिया र नास्ता नभए सांसद नआउने, कोरम नपुग्दा विधेयक पास नहुने

६ असोज, काठमाडौं । मंगलबार सभामुख देवराज घिमिरेले संसदीय समितिहरुमा विचाराधीन रहेका विधेयकबारे समितिका सभापतिसँग छलफल गरेका छन् । उनले आगामी अधिवेशनमा विधेयक पेश गर्न निर्देशन पनि दिएका छन् । तर, समितिका सभापतिहरूको गुनासो भने छुट्टै छ । 

सभामुख घिमिरेले मंगलबार संसदीय समितिका सभापति र प्रमुख दलका प्रमुख सचेतक तथा सचेतकहरुलाई बोलाएका थिए । उनीसँग संसदीय समितिका सभापतिहरूले बैठक राख्न कोरम नपुगेको गुनासो गरे ।  चिया र नास्ता छैन भन्दा सांसद नआउने र बैठकको कोरम नपुग्ने गुनासो उनीहरुको थियो । 

सिंहदरबार स्थित आफ्नै कार्यकक्षमा भएको छलफलमा सभामुख घिमिरेले कुन समितिमा कति विधेयक छन् ? त्यसलाई पास गर्न कति समय लाग्छ भनेर चासो राखेका थिए । बैठकमा पाँचवटा समितिका सभापति उपस्थित थिए । प्रतिनिधिसभा अन्तर्गतको उद्योग तथा वाणिज्य र श्रम तथा उपभोक्ता हित समितिका सभापति अब्दुल खानले सांसदहरू निर्वाचन क्षेत्रमा पुग्नुपर्ने अवस्थाले बैठक बस्न कोरम नपुगेको बताए ।

समिति सभापतिहरूले संसद अधिवेशन अन्त्य भएसँग बैठक बस्न नसकेको बताए । अधिकांश सांसद गृह जिल्लामा गएकाले बैठक बस्न कोरम समेत नपुगेको उनीहरुले बताए । बैठक बस्दा चिया नास्ताका लागि समेत समस्या भएको समिति सभापतिहरूले बताए । सभामुख घिमिरेले भने संसदको अधिवेशनमा समितिमा रहेका सबै विधेयक पेश गर्न निर्देशन दिएका थिए । 

बैठकमा सत्तापक्ष एमालेका मुख्य सचेतक महेश बर्तौला, कांग्रेस प्रमुख सचेतक श्यामकुमार घिमिरे, माओवादी केन्द्रका प्रमुख सचेतक हितराज पाण्डे, राष्ट्रिय स्वतन्त्र पार्टीका प्रमुख सचेतक सन्तोष परियार र राष्ट्रिय प्रजातन्त्र पार्टीका प्रमुख सचेतक ज्ञानबहादुर शाहीलगायत सहभागी थिए । 

राज्य व्यवस्था तथा सुशासन समिति, पूर्वाधार विकास समिति, शिक्षा, स्वास्थ्य तथा सूचना प्रविधि समिति, उद्योग तथा वाणिज्य र श्रम तथा उपभोक्ता हित समिति, कानुन, न्याय तथा मानव अधिकार समिति र अर्थ समितिमा दफावार छलफलका लागि विधेयक रहेका छन् । यी विधेयक संसद अधिवेशन अगाडि सक्न सभामुखले निर्देशन दिएका हुन् ।