प्रदर्शनमा साथ नपाएपछि सहकारी पीडितलाई धम्क्याउन घरघरमा पुग्न थाले रास्वपाका नेता र कार्यकर्ता

७ कात्तिक, पोखरा । कास्कीकाे सूर्यदर्शनसहितका सहकारी पीडितले राष्ट्रिय स्वतन्त्र पार्टी (रास्वपा) का नेता र कार्यकर्ताहरूले घरघर पुगेर आफूहरूलाई धम्क्याउने र प्रभावित पार्ने गरेको बताएका छन् । सूर्यदर्शन सहकारी पीडित संघर्ष तथा तदर्थ समिति र सहकारी पीडित संघ कास्कीले बुधबार प्रेस विज्ञप्ति जारी गरी रास्वपा नेता तथा कार्यकर्ताले पीडितको घर घरमा पुगेर धम्क्याउन थालेको आरोप लगाएका हुन् । 

रवि लामिछाने पक्राउ परेपछि यतिबेला राष्ट्रिय स्वतन्त्र पार्टीका नेता कार्यकर्ताहरू पोखरा केन्द्रित छन् । देशैभरीबाट कार्यकर्तालाई आउन आह्वान गरेपनि प्रदर्शनमा अपेक्षाकृत प्रदर्शनकारी उपस्थित नभएकाले नेताहरु हैरान छन् । धेरै कार्यकर्ता हरेक दिन प्रदर्शनमा उतार्ने रास्वपाको तयारी थियो । तर, स्थानीय समेत आएनन् । पोखरेलीले पनि प्रदर्शनमा सहयोग गरेनन् । 

उनीहरू प्रदेश कोणसभा र प्रदर्शनहरूमा देशका लागि सडकमा झर्न पोखराका नागरिकहरूलाई आह्वान गर्छन् । तर पोखराका नागरिकहरू सोचे झैँ सडकमा झरेका छैनन् । पोखरेलीले आन्दोलनमा साथ नदिएपछि रास्वपाका नेताहरू घरघरमा पुगे सहकारी पीडितलाई धम्की दिन थालेको बताइएको छ । 

पीडितहरूले रास्वपासँग १० महिनाअघि नै पार्टी सभापति रवि लामिछानेविरुद्ध किटानी जाहेरी पर्दा के हेरेर बसेका थियौ भन्ने प्रश्न पनि गरेका छन् । अहिले पोखराका चोक चोकमा गरिएका आन्दोलन सहकारी पीडितविरुद्ध भएको जिकिर पनि विज्ञप्तिमा गरिएको छ । पीडितहरूले आफ्ना पक्षमा उभिन र बिहीबार पोखराको मुस्ताङचोकमा आयोजना हुने विरोध र्यालीमा सहभागी हुन नागरिक समाज र राजनीतिक पार्टीसँग अनुरोध पनि गरेका छन् ।

पोखराको सूर्यदर्शन सहकारी ठगी प्रकरण अनुसन्धानका लागि नेपाल प्रहरीको केन्द्रीय अनुसन्धान ब्यूरो (सीआईबी) ले पूर्वगृहमन्त्रीसमेत रहेका रास्वपा सभापति लामिछानेलाई यही कात्तिक ३ गते काठमाडौँबाट पक्राउ गरी पोखरा ल्याएको हो । हाल उनलाई जिल्ला प्रहरी कार्यालय, कास्कीको हिरासतमा राखिएको छ । यस क्रममा जिल्ला सरकारी वकिल कार्यालय कास्कीमा लामिछानेसँग बयान लिन सुरु गरिएको छ ।