हल्लाको पछि नलाग्नु, सरकारले दल विभाजनसम्बन्धी अध्यादेशको तयारी गरेको छैनः प्रधानमन्त्री

७ कात्तिक, काठमाडौं । प्रधानमन्त्री केपी शर्मा ओलीले राजनीतिक दललाई विभाजन गर्ने मनसाय राखेर सरकारले कुनै पनि अध्यादेशको तयारी नगरेको बताएका छन् । दल विभाजन गर्न अध्यादेश ल्याउन लागेको भन्दै विपक्षी दलहरूले ध्यानाकर्षण गराइरहेका बेला प्रधानमन्त्रीले हल्ला असत्य भएको बताएका हुन् । 

दलहरू विभाजन गर्न सजिलो हुने गरी अध्यादेश ल्याउने बारे कुनै तयारी नभएको सत्तासाझेदार दलहरुलाई प्रधानमन्त्रीले जानकारी गराएका हुन् । बुधबार बिहान बालुवाटारमा बसेको सत्तारुढ दलको बैठकमा यसबारे कुरा उठेपछि प्रधानमन्त्रीले प्रष्टीकरण दिएका हुन् । प्रधानमन्त्री ओलीले विपक्षी दलका नेताहरूले समेत ज्ञापनपत्र बुझाउँदा अध्यादेशको कुरा उठाएको भन्दै त्यसबारे अहिले कुनै छलफल नभएको जानकारी गराएका थिए । 

सरकारले आवश्यक परे ल्याउन सक्छ तर त्यस्तो कुरा अहिले हामीले गरेका पनि छैनौं,’ ओलीले बैठकमा भनेका थिए । कानुनको शून्यता अहिले रहे पनि त्यसको तयारी नभएको भनेर आफूले विपक्षी दलका नेताहरूलाई समेत भनेको ओलीको भनाइ थियो ।