न्यायाधीश तिलप्रसाद श्रेष्ठको आदेशपछि जग्गा दानबारे एमालेविरुद्ध सर्वोच्चमा दर्ता भयो रिट

७ कात्तिक, काठमाडौं । भ्रष्टाचारी अभियोगबाट सफाइ नपाएका व्यक्तिबाट लिएको दान पनि भ्रष्टाचार नै हुने भन्दै नेकपा एमाले र त्यसका अध्यक्षसमेत रहेका प्रधानमन्त्री केपी शर्मा ओलीविरुद्ध सर्वोच्च अदालतमा रिट दर्ता भएको छ । यो रिटमा भोलीबाट सुनुवाइ हुनेछ । व्यवसायी मीनबहादुर गुरुङले नेकपा एमालेलाई केन्द्रीय कार्यालय भवन बनाउन गरेको भनिएको जग्गादानविरुद्ध सर्वोच्च अदालत रिट परेको हो । 

यसअघि सर्वोच्च अदालतमा यो रिट दर्ता गर्न नमिल्ने भन्दै रजिस्ट्रार भद्रकाली पोखरेलले दरपीठ गरिदिएका थिए । सो दरपीठलाई न्यायाधीश तिलप्रसाद श्रेष्ठको इजलासले बदर गरिदिएको छ । न्यायाधीश श्रेष्ठको इजलासबाट उक्त रिट सार्वजनिक सरोकारको भएकाले दर्ता गर्न आदेश भएपछि भोलिका लागि पेशीमा राखिएको सर्वोच्च प्रशासनले जनाएको छ । उक्त दान खारेज गर्न माग राखी ज्ञानकुमार बस्नेतले सर्वोच्च अदालत रिट निवेदन दिएका हुन् । सो रिट दर्ता भएको छ । 
 
गुरुङले गत असोज २५ गते काठमाडौँको कीर्तिपुर–२, मैत्रीनगरमा नेकपा एमालेलाई केन्द्रीय कार्यालय भवन बनाउन १० रोपनी १४ आना जग्गा दिएको घोषणा गरेका थिए । त्यही दिन एमाले अध्यक्ष केपी शर्मा ओली र गुरुङ दम्पतीले भवनको शिलान्यास समेत गरेका थिए । यसपछि यो विवाद राजनीतिक तहसम्म पुगेको छ । सबै राजनीतिक दलले यसलाई प्रतिष्ठाको विषय बनाएका छन् ।