कात्तिक ८ को डेटलाइनमा उद्योगीले बक्यौता नतिरेपछि लाइन काट्न प्राधिकरणले थाल्यो छलफल

८ कातिक, काठमाडौं । नेपाल विद्युत प्राधिकरणले उद्योगीहरुलाई डेडिकेटेड फिडर तथा ट्रंकलाइनको बक्यौता तिर्न दिएको समय आज सकिँदैछ । उद्योगीले समयभित्र बक्यौता नबुझाएपछि लाइन काट्ने विषयमा प्राधिकरण सञ्चालक समितिको बैठकमा छलफल सुरु भएको छ । आजै प्राधिकरणको निर्णय सार्वजनिक गरिने बताइएको छ । 

प्राधिकरण स्रोतका अनुसार अहिले लाइन काट्ने विषयमा छलफल गर्न सञ्चालक समितिको बैठक बसिरहेको छ । उद्योगीहरुलाई डेडिकेटेड फिडर तथा ट्रंकलाइनको बक्यौता तिर्न ३ महिनाको समय दिएर लाइन जोडिदिएको थियो । उक्त ३ महिनाको अवधि आज बिहिबार पूरा हुँदैछ । ऊर्जा मन्त्रालयको निर्देशनका आधारमा प्राधिकरणले २०७२ माघदेखि २०७५ वैशाखको डेडिकेटेड फिडर तथा ट्रंकलाइनको बक्यौता तिर्न उद्योगीहरुलाई पत्र पठाएको थियो ।

असार ९ गते ६ अर्ब ६० करोड ७८ लाख रुपैयाँको बक्यौता तिर्न १५ दिनको समय दिएर जानकारीसहितको पत्र पठाएको हो । उद्योगीलाई दिएको समय सकिएको भन्दै  प्राधिकरणले धेरै बक्यौता रहेका ६ वटा उद्योगको लाइन काटेको थियो । उद्योगीहरुले टाइम्स अफ डे मिटरिङ (टिओडी) मिटरको रेकर्ड दिए मात्रै बक्यौता तिर्ने बताएका छन् । उनीहरुले प्रमाण नभएको भन्दै बक्यौता नतिर्ने बताउँदै आएका छन् ।