७८ हजार घुससहित दिउँसै समातिए सिम्रौनगढ नगरपालिकाका प्रशासकीय अधिकृत साह

८ कात्तिक, बारा । अख्तियार दुरुपयोग अनुसन्धान आयोगको टोलीले बाराको सिम्रौनगढ नगरपालिकाका निमित्त प्रमुख प्रशासकीय अधिकृत वीरेन्द्रप्रसाद साहलाई पक्राउ गरेको छ । टोलीले बिहीबार दिउँसो ७८ हजार नगदसहित साहलाई नियन्त्रणमा लिएको हो । 

सेवाग्राहीसँग घुस लिएको आरोपमा हेटौंडाबाट खटिएको टोलीले साहलाई कलैयाबाट नियन्त्रणमा लिएको अख्तियारले जनाएको छ । कलैया उपमहानगरपालिका–४ मा सेवाग्राहीसँग रकम लिइरहेको अवस्थामा साहलाई नियन्त्रणमा लिइएको अख्तियार हेटौंडाका सूचना अधिकारी गोविन्दप्रसाद गौतमले जानकारी दिए । 

साहले बिल भुक्तानी गरिदिने भन्दै सेवाग्राहीसँग उक्त रकम लिएका थिए । रकम लिइरहेको अवस्थामा पक्राउ परेका साहलाई आवश्यक कारबाहीका लागि हेटौंडा लगिएको छ ।