प्रचण्डको आदेशमा रोकिएको मुद्दा व्यूतिँदै, रविमाथि सम्पत्ति शुद्धीकरणमा अनुसन्धान हुने

९ कात्तिक, काठमाडौं । रास्वपाका सभापति रवि लामिछानेको सम्पत्ति र आय आर्जनमाथि समेत अनुसन्धान सक्रिय भएको छ । सम्पति शुद्धीकरण विभागले पनि उनीमाथि अनुसन्धान शुरु गरेको हो ।

सहकारी ठगी प्रकरणमा मुछिएका पूर्वगृहमन्त्री तथा राष्ट्रिय स्वतन्त्र पार्टी (रास्वपा) का सभापति रवि लामिछाने सम्पत्ति शुद्धीकरणमा तानिएका छन् । प्रधानमन्त्री कार्यालय मातहत रहेको सम्पत्ति शुद्धीकरण विभागले रविको सम्पत्ति खोजबिन शुरु गरेको हो । २०८० सालमै विभागले खोजवीन शुरु गरेको भएपनि गृहमन्त्री भएपछि रोकिएको थियो । तर उनी पक्राउ परेपछि विभागले यसको प्रकृया अघि बढाएको छ ।

ग्यालेक्सी टेलिभिजनको शेयर किनबेचका क्रममा आर्थिक कारोबार नभएको भन्दै उनले पत्रकार सम्मेलन गरेकै दिन २०८० माघ ८ गते विभागले २० वटा बैंकलाई पत्र लेखेर खाता विवरण तथा कागजात उपलब्ध गराउन भनेको थियो । ती बैँकले त्यसबेलै विवरण पनि बुझाएका छन् । विभागले सम्पत्ति शुद्धीकरण सम्बन्धी कसुरको जाँचबुझको सिलसिलामा आवश्यक परेकाले बैंक खाता विवरण, खाता खोल्दाको कागजातहरू र बैंक मौज्दात पठाइदिन अनुरोध गरिएको छ भनेर उल्लेख गरेको पत्र पठाएको थियो । रविसँगै ग्यालेक्सी फोर के टेलिभिजनका मालिक गितेन्द्रबाबु (जीबी)राईको विवरण माग गरिएको छ । बैंकहरुले विवरण पनि पठाइसकेका छन् । 

विभागले राष्ट्रिय वाणिज्य बैंक, नबिल बैंक, नेपाल इन्भेष्टमेन्ट मेगा बैंक, स्ट्याण्डर्ड चार्टर्ड बैंक, हिमालयन बैंक, एसबिआई, एभरेष्ट, एनआईसी एसिया, कुमारी, कृषि विकास बैंकलगायतलाई चिठी लेखेको थियो । ग्यालेक्सीमा प्रबन्ध निर्देशक रहँदाका बखत भएको उक्त गैरकानुनी कारोबारमा ‘स्वेट शेयर’ लिएको दावी गर्ने रवि पनि मुछिएका हुन् ।

लामिछानेविरुद्ध कास्की प्रहरीले सम्पत्ति शुद्धीकरण सम्बन्धी कसुरमा पनि अनुसन्धान सुरु गर्ने भन्दै म्याद थप गरेपछि विभागलाई झन सहज भएको हो । सङ्गठित अपराध, ठगी र सम्पत्ति शुद्धीकरण मुद्दामा अनुसन्धान गर्न अदालतबाट थप ७ दिनको म्याद लिइएको जिल्ला प्रहरी कार्यालय कास्कीले जनाएको छ । विभागले अनुसन्धान शुरु गरेपछि लामिछाने दोस्रो पटक गृहमन्त्री भएका थिए । त्यसमा प्रधानमन्त्री पुष्पकमल दाहाल रहेका थिए । दाहालको ठाडो आदेशमा सम्पत्ति शुद्धीकरणको मुद्दा अघि बढेको थिएन ।