भूमिहीनका समस्या समाधान गर्न मंसिरभित्र सबै जिल्लामा भूमि आयोग गठन गरिने

९ कात्तिक, काठमाडौं । सरकारले भूमि आयोग गठन गर्ने तयारी गरेको छ । तिहार लगत्तै भूमि आयोग गठन गरी मंसिर भित्र सबै जिल्लामा जिल्ला भूमि आयोग गठन गरी काम अघि बढाउने तयारी सरकारले गरेको हो । भूमि व्यवस्था, सहकारी तथा गरिबी निवारण मन्त्री बलराम अधिकारीले अधिकार सम्पन्न भूमि आयोग गठनको प्रक्रिया अन्तिम चरणमा पुगेको जानकारी दिएका हुन् ।   

जिल्ला मालपोत कार्यालय खाँदबारीको भवन उद्घाटन गर्ने क्रममा मन्त्री अधिकारीले भूमिहीन र सुकुम्बासीको समस्या दुई वर्षभित्र समाधान गर्ने प्रतिबद्धता सरकारले लिएको बताए । यही महिना भित्रै भूमि आयोग गठन गर्ने उनले जानकारी दिए ।  

मंसिर महिना भित्र सबै जिल्लामा भूमि आयोग गठन गरिसक्ने सरकारको तयारी रहेको उनले बताए ।  प्रदेश र स्थानीय तहसँग समन्वय गरेर सबै भूमिहिनलाई जग्गा उपलब्ध गराउने गरी गरिबी निवारणलाई सरकारको उच्च प्राथमिकतामा राखेको मन्त्री अधिकारीको भनाइ थियो ।

लामो समयसम्म जमिन भोग गर्दै आए पनि लालपूर्जाविहीन भएर बस्नुपर्ने अवस्थाको अन्त्य गर्न सरकार लागिपरेको उनले बताए । जिल्ला मालपोत कार्यालयको भवन रु दुई करोड २० लाखको लागतमा निर्माण सम्पन्न भएको हो ।